Кампањата за претседателските избори на Република Северна Македонија, што ќе се одржи на 24 април, влезе во дванаесеттиот ден. Кандидатите продолжуваат со собирите во општините низ целата земја, но и со учество на телевизиски интервјуа и изјави пред граѓаните.
Пендаровски: Во развиениот свет се влегува преку договор со првите комшии
„Нема друг начин да влезете во развиениот свет отколку да се договорите со првите комшии, па после да размислувате за интеграција во пошироките организации“, рече меѓу другото претседателскиот кандидат Стево Пендаровски, на митингот во Крива Паланка.
Пендаровски посочи дека првата крупна работа е тоа што пред четири години влеговме во најмоќната воена организација во историјата на човештвото, НАТО, со тоа добивме тапија за територијалниот интегритет и суверенитет на државата и секој нејзин граѓанин.
Силјановска Давкова: Не прифаќајте диктати од соседи
„Немаме ништо против уставни измени со кои ќе се гарантираат европските стандарди во сите области, ама ве молиме, немојте да прифаќате диктати од соседи што се спротивни на европските вредности и на европското уставно право, бидејќи ние ќе го браниме европското уставно право. Не можам едно да им предавам на студентите за европското уставно право“, а друго да правам во реалноста, рече кандидатката Гордана Силјановска Давкова, на митингот во Кисела Вода.
Димитриевски: Бришење на формулацијата „јазикот кој го говорат 20 %“ за мене се неприфатливи
„Евентуални предлози за уставни измени кои би се однесувале на бришење на формулацијата „јазикот кој го говорат 20 %“ за мене се неприфатливи, бидејќи го подриваат фундаментите на кој почива Охридскиот рамковен договор, за кој сметам дека е 100% реализиран“, рече во интервју за белградскиот весник „Политика“ претседателскиот кандидат Максим Димитриевски.
Ванковска: Мора сите нив да ги расчистиме бидејќи се сијамски близнаци
Мојата противкандидатка е постојано фаворизирана како иден претседател, а што ни нуди мојата колешка? Внесување на Бугарите во Устав со одложено дејство. Втор го фаворизираат Стево, кој се фали дека направил добра работа што не внел во НАТО, а што добро направил со тоа, освен да плаќаме за милитаризација.
Бујар, како што рече, е една чудна ѕверка која размислува дали да се кандидира за европски претседател или да се кандидирал за генерален секретар на НАТО.
Ние мора сите нив да ги расчистиме бидејќи се сијамски близнаци, порача претседателската кандидатка, Билјана Ванковска.
Јакимовски: Во ова тешко време многу е важно кој ќе биде врховен командант
“На 1 200 километри јужно од нас и на 1 200 километри воздушна линија северно од нас се одвиваат страшни војни. Тоа јасно покажува дека живееме во тешко време и многу е битно кој ќе биде врховен командант на оружените сили на Република Македонија, зашто за многу кратко време може да се случи да влеземе во страшна војна, зашто во 2013 година на тлото на Европа, НАТО немаше ниту еден тенк, денеска се преку 3000 тенкови“, рече кандидатот за претседател Стевче Јакимовски.
Предизборни услови за втор круг
Министерот за политички систем, Артан Груби во интервју изјави дека ДУИ би му ги дала гласовите во вториот круг од претседателските избори, доколку нивниот кандидат Бујар Османи отпадне во првиот, на онаа политичка партија која ќе се заложи претседателот на државата во иднина да се избира во Собранието.
„Пендаровски се има изјаснето на оваа тема. Прашањето е дали ДПМНЕ го промениле ставот?“, соопштија од тимот на Пендаровски.
ОД ВМРО-ДПМНЕ овој услов на ДУИ го нарекоа уцена на Артан Груби.
Претседателски кандидати во парламентарна кампања
Претседателските кандидати Бујар Османи и Гордана Силјановска Давкова деновиве се расправаа околу повикот на ВМРО-ДПМНЕ до граѓаните, да им дадат 61 пратеник. Овој повик кандидатот на Европскиот фронт го нарече нај-националистички.
На ова преку социјалната мрежа Твитер возврати Давкова која „интергративците“ ги нарече криминалци.
МОНИТОРИНГ НА ЦИВИЛ: СТОП за злоупотреба на деца во изборна кампања!
Мониторинг тимот на ЦИВИЛ констатира повеќе случаи на злоупотреба на деца и малолетници за време на изборната кампања од речиси сите кандидати во трката за претседател на Република Северна Македонија.
ЦИВИЛ ги потсетува политичките партии, родителите, медиумите и институциите дека секое дете, без исклучок, има право на достоинствен живот и да ги ужива сите права наведени во Декларацијата за правата на децата и во Законот за заштита на децата. Тие имаат право на безгрижно детство, ослободено од дневнополитичките случувања.
ИНИЦИЈАТИВА НА ЦИВИЛ –„ Ти одлучуваш. Гласај!“
Иницијативата на ЦИВИЛ носи наслов „Ти одлучуваш. Гласај!“ и обединува голем број јавни личности, јавни интелектуалци, уметници, универзитетски професори и активисти кои пред камерите на ЦИВИЛ говорат за важноста на гласањето и ги повикуваат граѓанките и граѓаните да излезат на гласање и да гласаат слободно и по сопствен избор.
Интересна новина е алатката за планирање на гласањето. Таа има цел да им помогне на граѓанките и граѓаните да го планираат своето гласање.
ЦИВИЛ ја лансира веб страницата ГЛАСАЈ. На оваа веб страница се објавуваат релевантни вести и информации за изборите, линкови до официјални извори, како и текстови и видео содржини за граѓанска едукација за правото на глас и важноста на граѓанското учество во изборните процеси.
Подготви: Д. Тахири во соработка со ЦМТ
Извор: Цивил Медиа
