Гордана Силјановска Давкова денеска во Собранието на Република Северна Македонија беше инаугурирана за претседателка на државата.
Врз основа на член 81 став 9 од Уставот на Република Северна Македонија, Сиљановска Давкова на 151. собраниска седница даде свечена изјава пред Собранието по што започнува да тече нејзиниот петгодишен мандат како шеф на државата.
За време на свечената изјава во Собранието, претседателката Силјановска Давкова не го користеше уставното име на државата и на местото Република Северна Македонија, претседателката изговараше – Македонија.
Од собраниската говорница Силјановска Давкова рече дека ќе биде претседателка на сите граѓани на државата и го истакна значењето на жените лидерки.
-Ќе го почитувам овој парламент, ќе ги заборавам лошите моменти, ќе ги помнам само добрите, ќе бидам претседателка и на левата и десната страна, на сите граѓани, нема да правам разлика меѓу нив по етничка, верска, полова ни по која било друга основа. Ќе се обидам да ги оправдам овие илјадници гласови кои не се само најубав подарок за мојот роденден, туку и најголема обврска и одговорност, истакна Силјановска-Давкова на инаугурацијата на 151 седница на Собранието, која ја водеше претседателот на Собранието, Јован Митрески.
Со денешната инаугурирација во Собранието, Силјановска Давкова официјално ја презема должноста шеф на државата и ќе биде првата жена и шести претседател од осамостојувањето на земјава.
По заклетвата во Собранието, според најавата, Силјановска-Давкова на официјална церемонија со највисоки државни и воени почести, во Кабинетот на Претседателот во „Вила Водно“ ќе ја преземе функцијата од досегашниот претседател на државата, Стево Педаровски, со кого потоа ќе има тет-а-тет средба.
Ј. Ѓ.
