Франција денеска има намера да го импресионира светот со екстравагантна церемонија на отворање на Олимписките игри во Париз каде околу 45.000 полицајци, 10.000 војници и 2.000 лица од приватни компании за обезбедување ќе се грижат за безбедноста на парадата покрај реката Сена, нејзиниот брег и околните споменици.
Планирано е речиси 7.000 спортисти да запловат по реката Сена покрај најпознатите париски знаменитости, додека повеќе од 300.000 гледачи ќе ги следат од брегот.
Уникатното шоу на реката Сена ќе започне вечерва во 19:30 часот.
На Игрите ќе настапат 10.500 спортисти од 206 држави, кои ќе се натпреваруваат во 32 спортови, а прв пат во историјата ќе бидат поделени олимписки одличја во брејкденс.
Македонската олимписка експедиција ја сочинуваат шестмина спортисти – Дарио Ивановски (атлетика), Владимир Егоров (борење/ до 57 кг, слободен стил), Никола Ѓуретановиќ (пливање/ 400 метри слободно), Анастасија Мојсовска (стрелаштво/10 метри воздушна пушка), Еди Шерифовски (џудо) и Мила Рељиќ (таеквондо).
Знаменосци на свеченото отворање ќе бидат Дарио Ивановски и Мила Рељиќ.
Покрај спортистите, Македонија на ЛОИ ќе ја претставуваат и судиите Ѓорѓи Начевски и Славе Николов (ракомет), Иван Михајловски (триатлон) и Анета Павловска (тенис).
Игрите официјално ќе ги отвори францускиот претседател Емануел Макрон, а на свечената церемонија најавено е присуство на околу 120 шефови на држави и влади и други функционери, меѓу кои и германскиот канцелар
Олаф Шолц и првата дама на САД Џил Бајден. Според весникот „Паризиен“, украинскиот претседател Володимир Зеленски нема да биде во Париз.
Засега не се знае кој ќе го запали олимпискиот оган, но според медиумите оваа чест ќе и биде доделена на француската спортистка и трикратна олимписка шампионка Мари Жозе Перек или на фудбалската ѕвезда Зинедин Зидан.
Свеченостите ќе вклучуваат музички и танцови изведби, како и светлосно шоу со настап на 400 танчари и 3.000 уметници.
Олимписката програма официјално почна во средата, а Игрите во Париз ќе траат до 11 август.
ОИ се одржуваат во време на големи безбедносни ризици, односно во време на засилени геополитички тензии.
Од последните Олимписки игри во Пекинг во 2022 година, избувнаа војни во Украина и Газа, што сега е тензична позадина на Игрите. Франција е на највисоко ниво на безбедност, иако официјалните лица повторија дека нема посебна закана за церемонијата на отворање или за самите игри.
Како дел од големата безбедносна операција, властите ставија 155 лица под мерки за надзор кои строго го ограничуваат нивното движење според законот за антитероризам.
Израелските натпреварувачи ќе бидат придружувани од елитни тактички единици, а тие натпреварувачи ќе имаат 24-часовна заштита за време на Олимписките игри, посочуваат надлежните.
Десетици светски лидери ќе бидат во Париз на свеченото отворање, кое ќе биде заштитено со снајперисти на покривите. Коритото на реката Сена е исчистено од бомби, а воздушниот простор на Париз ќе биде затворен.
Авиони за радарски надзор и беспилотни летала Reaper ќе ги надгледуваат чувствителните локации одозгора, а борбените авиони Мираж 2000 ќе бидат во состојба на подготвеност за пресретнување авиони што евентуално ќе залутаат во ограничен воздушен простор.
