Струмица ќе го добие најголемиот градски пазар во државата, истакна во објава на социјалните мрежи претседателот на СДСМ, Венко Филипче, приложуваќи фотографии од денешната посета на Струмица.
Реализацијата на овој капитален проект, на површина од 42.000 метри квадратни, вели Филипче, е од големо значење за граѓаните, за земјоделските производители и за трговците од Струмица.
„Инвестицијата е вредна 237 милиони денари. Станува збор за пазар по сите современи стандарди, со отворен и затворен дел. Му честитам на градоначалникот Костадин Костадинов за овој значаен проект. Драго ми е што градоначалниците на СДСМ досега успешно менаџираат со општините и ги реализираат ветените проекти. Општините кои ги раководат градоначалниците од редовите на СДСМ се пример за тоа како се работи одговорно, во интерес на граѓаните, како се реализираат изборните ветувања. Покрај овој проект, во Струмица се реализирани крупни инфраструктурни проекти, улици, булевари, водоводи, ученички дом, но и многу други проекти од значење за Струмица и за струмичани. Очекувам во иднина градоначалникот да продолжи со засилено темпо на работа и реализација на сите проекти“, истакна Филипче.
