БРАНКО ТРИЧКОВСКИ
Роботот Оптимус на Илон Маск ќе ја преобрази цивилизацијата и планетата, во
тоа не се сомневам, но најголема надеж полагам во неговата примена во Северна Македонија.
Во следната генерација Оптимус би можел да биде премиер, а со оглед на решението што го имаме денеска, мислам дека и во сегашното издание може да седне на чело на македонското правителство.
Да се вози во прва класа со здрави колена, со синчето до себе на сметка на домашниот буџет, да се облекува кај Зења и Хермес, да седи на маса со Орбан и Радев, да ја напише преговарачката рамка со БРИКС според моделот на македонските национални интереси, да го врати вечното име чија вечност предавниците од сдсм и дуи ја беа прекинале, Оптимусот весна, нормално, во својот ххххххл формат, ќе го преобрази образованието во голема фабрика за производство на вморонски бројлери, децата што останаа, колку се толку се, да ги научи да ја бранат Македонија од клетите непријатели, оптимусите ќе ја шишаат тревата пред владата и во дворовите на Горското началство, ќе го ебат националниот координатор за демографија и така ќе ја подобруваат популационата слика на Македонците, ќе бидат добри академици кои од поморот на македонскиот род ќе направат пуканки за во кино и ќе ги делат во фишеци од национални манифести и меморандуми, таканаречени ќулафки, ќе ги откријат корените на македонскиот јазик во шестиот век пред Христа и ќе научат да свират на зурли, тапани и гајди.
Добро, и кавали и сворчиња.
Тоа е една реална проекција во која роботите доаѓаат како очовечена форма за да интервенираат во настојувањето на Македонците да ја убијат државата и да исчезнат од богатството на животинското царство побргу од царските пингвини.
Да им се најдат.
Маск вели дека во следната генерација ќе можат да ги претворат сите вморони во биомаса затоа што првата генерација ќе им остави порака дека со вакви идиоти не се работи држава.
Голем број Македонци веќе се орвеловски роботизирани во моделот Октопус вмро-дпмне. Нормалните Македонци секој ден го слушаат владиниот агент О’Браен како повторува:
„Ние владееме со животот, Винстоне (еден од нормалните Македонци), ти замислуваш дека постои нешто што се вика човечка природа која ќе се згрози над она што го правиме и ќе се сврти против нас. Но човековата природа ја правиме ние. Луѓето се бескрајно ковки.“
Винстон е еден од поединците кои Партијата сака да го сведе на компонента која постои само за да ги унапредува интересите на целината. Националните интереси на Македонија. Винстон сѐ уште е нормален Македонец затоа што се буни и заедно со својата љубовница Јулија почнува потрага по едноставни задоволства – шеќер, кафе, бела хартија за пишување, приватни разговори, нежно видење на љубов. Но, владиниот агент О’Браен јасно му кажува дека такво поведение нема да се толерира.
Денеска во Нордот за таквите ко Винстон, викаат дека се предавници.
Ако додека сите одговорни припадници на нацијата и верни чеда на Партијата и на Големиот брат, мразат Шиптари и балансери, а ти сркаш кафе на некоја тераса или ебеш некоја убава мома, ти си изрод и предавник кого партијата или ќе го превоспита или ќе го ликвидира.
Или ќе ти даде 5 посто поголема плата!
Хахаха!
Ова е можеби пренагласено драматизирање на ситуацијата во Македонија, но она што не е пренагласено, туку е точно и најопасно, е фактот дека злосторничката власт сега и истата структура кога беше во опозиција, заедно со сите медиуми, ја променија во катастрофа природата на Македонецот до мерка во која тој всушност престана да знае што е и да постапува во согласност со тоа што е. Сега е Македонец кој се однесува како магаре или е магаре кое глуми дека е Македонец, така некако. Со тоа што во таа промена што ја изврши Октопусот вмро-дпмне, го вгради чипот на сопствената непроменливост.
Од магарето да не може со никаква еволуција или еднократна научна интервенција да се направи Македонец.
Оптимусот на Маск нема капацитети за таков подвиг.
Можеби некоја нова генерација.
Оптимус 34 ПРО!
Веројатно дека триесет и четворката ќе може од магарето да направи Македонец, но се поставува прашањето за кој курац роботите би ризикувале ново загадување на животната средина само поради некакви романтични или биодиверзитетни причини.
Само нормалните Македонци можат на Големиот архитект да му пружат смислени причини на својата борба против помагарчувањето на нацијата, односно против злосторничката инсталација на Октопусот вмро-дпмне.
