Германскиот канцелар Олаф Шолц ги повика пратениците да избегнат политичка блокада пред вонредните избори што се очекуваат во февруари, јави ДПА.
Одговарајќи на прашања во Бундестагот – Долниот дом на германскиот Парламент – Шолц побара од опозициските партии да поддржат низа важни закони предложени од неговата малцинска влада.
– Предизборната кампања не е време за застој. Сè уште можеме да направиме нешто, рече Шолц. „Ве повикувам да го дадете својот придонес.“
Откако тричлената коалиција на Шолц се распадна на почетокот на ноември, неговата влада е зависна од поддршката на конзервативната Христијанско-демократска унија (CDU) или на Слободните демократи (FDP), поранешниот коалициски партнер.
И покрај тоа, Шолц постојано ја изразува својата решеност да продолжи со парламентарната работа на серија закони пред да иницира гласање за доверба кон средината на декември, што би овозможило изборите да се одржат на 23 февруари.
Шолц денеска ги истакна прашањата како што се промените во даночните скали, зголемување на детскиот додаток и продолжување на финансирањето на националната субвенција за јавен транспорт, позната како „Дојчландтикет“.
Канцеларот исто така го нагласи значењето на стабилните цени на енергијата за германската индустрија и ги бранеше економските политики на неговата влада.
– Инвестициите под администрацијата на Шолц се многу поголеми од оние што сме ги виделе во минатото, аргументираше тој, истовремено потенцирајќи дека падот на глобалната економска побарувачка создава „поинаков предизвик“ за извозно ориентираната германска економија.
