Пишува: ДРАГАН МИШЕВ
Дрво – именка, среден род. Значење на дрво: 1. Повеќегодишно растение со корен, стебло и гранки. 2 што се користи за огрев или како материјал за обработка.
Декор – именка, машки род. Значење на декор: 1. Тоа со што е украсена театарската сцена. 2. Тоа што служи, што се јавува како украс на едно место: слики, шари, предмети и сл.
Дрво – декор беше име на салон за мебел во центарот на Скопје, според кој на времето се ориентираа Скопјани за да ја одредат локацијата од каде тргнуваа автобуси за (најчесто) прекугранични патувања и екскурзии, оние вистинските, а не екскурзии со паметот.
Дрво декор во преносна смисла го користеа Скопјани ( некои кои паметат од поодамна, ја користат и денес) кога сакаа(т) да означат некого кого не го бива, и најчесто во друштвото служи како декор, безгласен и без иницијатива.
Вака поставена, кованицава денес асоцира на најголемата опозициска партија, која еве никако да се консолидира, да заземе цврст став, доктрина на дејствување, да преземе препознатливи акции (тука не спаѓаат јаловите и стерилни соопштенија искажани од партиската говорница) со кои и на дело ќе го покажат она што го повторуваа по изгубените избори, дека ја примиле пораката, и дека ќе се променат, кон подобро. Но, освен рокадите во врвот на раководните структури на партијата со старо/нови имиња, се чини дека „све је исто, само њега нема“.
Летаргијата и безидејноста која беше толку видлива пред изборите и помеѓу двата изборни круга, продолжува и денес. Оние малкумина кандидати од партиските изборни листи кои успеаја да седнат во пратеничките клупи, очигледно толку се самозадоволија со постигнатото, што ете, немаат некои посериозни примедби на работењето на новата владејачка гарнитура. Наместо остри критики, реплики, контрареплики и останатиот арсенал од пратеничкото делување, одбраа да бидат салонска опозиција комотно залегната во ложата на театарска сала како на концерт на камерна музика, додека на политичката сцена си врви водвиљот со Мицкоски и ВМРО-ДПМНЕ во главна улога, и ЗНАМ и ВЛЕН како статисти .
Секако не така малата пратеничка плата ќе си легне на први, кај некои и зголемена за патни трошоци, па дајте да го истераме мандатов мирно, без турбуленции, зошто може, скраја да е, и без него да останеме. Затоа ќути, трај, какви интерпелации, какви предвремени избори, не дај Боже.
Изгледа заради тоа „да не даде Господ“ е толкавото одење по цркви, палење свеќи и глумење верници пред камери. Од толку цркви, партиското раководство на опозициската СДСМ, претседателот, потпретседателката и други знајни и незнајни партиски функционери, мораа да се истопорат токму во Соборниот храм, со сé целата демохристијанска владејачка номенклатура на Божиќното посланиe. Пред камерите на МРТВ.
Па уште партиските ботови побрзаа да го овековечат настанот и поздравувањето на Филипче со Мицкоски да го прогласат како доблесна христијанска вредност, додека истото другите го коментираа како одење на бацирака кај премиерот.
Чуму? Дали повторно некој „експерт – аналитичар“ им подметнал „анализа“ или „истражување“ според кое, доколку се претставуваат како „Социјал Демо-христијански Сојуз“ ќе добијат некој глас повеќе? Во секуларна држава?
Очигледно, лекциите од изборниот пораз не се научени. А локалните избори се зад аголот.
Господ на помош, оти „Шарените“ одамна ги потрошија!
Преземено: Цивил Медиа
