Денеска завршува новогодишната кошничка која траеше еден месец и беше формирана на иницијатива на бизнис секторот. Вклучуваше над илјада производи, а надлежните очекуваа поевтинување на основните прехранбени производи за најмалку 10 проценти.
Бидејќи беше на иницијатива на бизнис секторот, немаше владина одлука, а Државниот пазарен инспекторат можеше да врши само мониторингот на цените во согласност со Законот за заштита на потрошувачи и Законот за трговија, односно се гледаа цените на производите кои се во Новогодишната кошница и најниските цени на истите производи кои биле во последните 30 дена.
Јавноста регираше дека немаше реално намалување на цените со „новогодишната кошничка“.
Според граѓаните, трговците 30 дена пред да стапи мерката на сила ги покачија цените повеќе од тоа што беа на продажна цена, за со намалувањето од 10% со мерката да се вратат пак на истата цена. Но, додаваат дека не само што не се вратени на исто, туку се поголеми од тоа што беа пред мерката да стапи во сила.
Надлежното Министерство за економија и труд апелираше до трговците да се придржуваат до договореното, најавувајќи дека доколку тоа не се случи, ќе се активира одлука за замрзнување на цените или ограничување на маржите.
Од СДСМ велат – „кошничките“ на власта се целосно промашување, донесоа поголема скапотија за граѓаните
– Политиките на власта на Мицкоски и ДПМНЕ со така наречени кошнички се покажаа како целосно промашување. Цените не се намалија, туку за одредени производи и се зголемија. „Кошничките“ донесоа поголема скапотија за граѓаните. Зејтинот, јајцата, шекерот, млечните производи, грашакот, гравот, леќата, сѐ е поскапено. Оваа сурова реалност која граѓаните ја гледат во маркетите и продавниците секој ден е најголем показател за фарсата којашто ја приреди власта, реагираат од СДСМ.
Оттаму велат дека „од „кошничките“ се збогатија големите трговци, дестина милиони евра се извлечени од џебовите на граѓаните со амин на Мицкоски и ДПМНЕ“.
„Последните податоци од Државниот завод за статистика уште еднаш го потврдуваат тоа –цените растат, граѓаните имаат се поголеми трошоци за живот а се помалку пари во цебовите. Трошоците за живот во декември 2024 година се зголемени за 4,4%, основните животни производи, без кои не може да се замисли ниту еден дом, поскапеле за 4,3%. Политиките на Мицкоски се јасно насочени кон заштита на интересите на големите трговци и елитата. Додека 99% од граѓаните сè повеќе се борат со зголемените трошоци за живот, 1% – оние блиски до власта – профитираат на нивна сметка. Оваа политика на Мицкоски ги турка семејствата во уште поголема економска несигурност и во поголема сиромаштија“, се наведува во соопштението од СДСМ.
Владата на 15 декември ја започна кампањата „Помалку трошоци, повеќе за тебе – Се грижиме“ која требаше да опфати над 800 прехранбени производи со намалени цени од најмалку 10 проценти.
Државниот завод за статистика обајви дека инфлацијата во декември лани е за 4,4 проценти повисока од истиот период во 2023 година и дека најголем скок има кај храната.
Ј. Ѓ.
