Денеска во светот се зголемува нееднаквоста бидејќи „аристократската олигархија“ собира богатство на непредвидени нивоа, се вели во извештајот објавен од развојната организација Оксфам, пренесува Дојче Веле.
Објавен во пресрет на Светскиот економски форум (СЕФ) во Давос, во извештајот насловен „Преземачи не создавачи“ се вели дека богатството на милијардерите се зголемило за 2 трилиони долари (1,94 трилиони евра) во 2024 година, растејќи три пати побрзо од претходната година.
Додека најбогатиот 1% сега поседува 45% од глобалното богатство, 44% од човештвото живее со помалку од 6,85 долари дневно, а глобалните стапки на сиромаштија едвај се промениле од 1990 година, се вели во извештајот.
„Го претставуваме овој извештај како остар повик за будење дека обичните луѓе ширум светот се уништени од огромното богатство на малкумина“, рече извршниот директор на Оксфам, Амитаб Бехар.
Богатите стануваат се побогати
Друга точка во извештајот беше тврдењето дека се очекува да се појават трилионери во следната деценија, бидејќи богатството на најбогатите 10 милијардери растеше во просек за 100 милиони долари дневно во последните 10 години.
Минатата година се појавија 204 нови милијардери, а вкупното богатство на милијардерите се зголеми за 2 трилиони долари во 2024 година.
Бехар предупреди дека е создаден економски систем каде што „милијардерите сега речиси можат да ги обликуваат економските политики, социјалните политики, што на крајот им дава сè поголем профит“.
Во Извештајот, исто така се истакнува дека една од десет жени на глобално ниво живее во екстремна сиромаштија, заработувајќи помалку од 2,15 долари на ден. Понатаму се додава дека жените обезбедуваат 12,5 милијарди часови на ден неплатена работа, додавајќи околу 10,8 трилиони долари на глобалната економија, што е три пати повеќе од вредноста на глобалната технолошка индустрија.
Политиките на Трамп може да поттикнат нееднаквости
Американскиот претседател Доналд Трамп, исто така, се спомнува во извештајот на Оксфам бидејќи неговите политики, вклучително даночни намалувања и дерегулација, се критикувани за потенцијално поттикнување на нееднаквоста и дополнително збогатување на милијардерите – вклучувајќи го и Илон Маск – главен поддржувач на кампањата за реизбор на Трамп.
„Крунскиот скапоцен камен на оваа олигархија е претседател милијардер, поддржан и купен од најбогатиот човек во светот Илон Маск, кој ја води најголемата светска економија“, рече Бехар.
Во Давос, демонстрантите со транспаренти на кои пишуваше „оданочете ги богатите“ и „запалете го системот“ се собраа пред самитот, кој се очекува главно да се фокусира на економските стратегии, вештачката интелигенција и глобалните конфликти.
Подготви: Ј. Ѓ.
