Демократите во Сенатот на САД го блокираа законодавството со кое ќе се санкционира Меѓународниот кривичен суд (МКС) за издавање налози за апсење на израелскиот премиер Бенјамин Нетанјаху и поранешниот министер за одбрана Јоав Галант за наводни воени злосторства во Газа.
Гласањето покажа дека законот добил 54 гласа за и 45 против, помалку од 60-те гласови потребни за конечно усвојување.
Експерти на Обединетите нации, европски функционери и сегашни и поранешни претседатели на управното тело на МКС, сите се изјаснија против нацрт-законот, предупредувајќи дека тој ќе претставува опасен преседан во време на растечко значење за меѓународниот правен поредок.
Но, многу демократи кои гласаа против мерката сè уште го обвинуваат судот за неправедна акција против Израел со издавање на налози против Нетанјаху и Галант. Судот истовремено издаде налог за апсење на командантот на Хамас, Мохамед Деиф за неговата улога во нападот врз јужен Израел на 7 октомври 2023 година.
Говорејќи пред гласањето, Чак Шумер, лидерот на демократите во Сенатот под контрола на републиканците, рече дека нацрт-законот за санкции „е оној што јас силно го поддржувам и би сакал да стане закон“.
-Сепак, колку и да се противам на пристрасноста на МКС против Израел, колку и да сакам да видам драстично реформирана и преобликувана таа институција, законот пред нас е лошо подготвен и длабоко проблематичен, рече тој, тврдејќи дека законот може да наштети и на САД, сојузниците и компаниите.
Говорејќи на говорницата во Сенатот за поддршка на нацрт-законот, водачот на мнозинството во Сенатот, републиканецот, Џон Тун, рече дека таргетирањето на „близок американски сојузник треба да не загрижува сите нас“.
-Иако МКС ги гаѓа Израелците денес, лесно би можел да ги нападне Американците, рече тој.
Сенаторот Џон Фетерман беше единствениот демократ кој гласаше за законот. Тој брзо ги заслужи пофалбите на Американскиот израелски комитет за јавни односи, исклучително влијателно произраелско лоби.
Во објава на „X“, групата му се заблагодари на Фетерман за неговиот „принципилен про-израелски став и за застанувањето со Израел против неоснованите напади на МКС“.
Во минатото, американскиот претседател Доналд Трамп зазеде строг став кон МКС, воведувајќи санкции за неговите службеници во 2020 година поради загриженоста дека судот ги истражува американските воени дејствија во странство. Администрацијата на поранешниот претседател Џо Бајден подоцна ја укина таа наредба, но Трамп ја смени одлуката на Бајден по преземањето на функцијата.
