Федералните службеници кои ги исполнуваат условите мора да донесат одлука до четврток, во 23:59 часот по источно време во САД, дали ќе ја прифатат понудата на администрацијата на претседателот Доналд Трамп за одложена оставка, со која ќе можат да ги напуштат работните места, но ќе продолжат да добиваат плата до крајот на септември.
Најмалку 40.000 вработени веќе ја прифатиле оваа понуда, изјави за Си-Ен-Ен функционер од администрацијата.
Оваа мерка претставува обид на администрацијата значително да го намали бројот на федерални службеници, што многумина ги доведува пред тешка одлука во однос на нивните кариери и иднина.
Иако портпарол на Канцеларијата за управување со персонал (OPM) ја опиша понудата како „ретка и дарежлива можност“, таа истовремено содржи и предупредување: оние што нема да ја прифатат можат да се соочат со отказ. Според двајца официјални претставници, администрацијата планира масовни отпуштања во скоро време.
Синдикатите на федералните работници ги повикаа своите членови да не ја прифаќаат понудата, доведувајќи ја во прашање нејзината законитост и можноста администрацијата да не ги исполни своите ветувања.
Во вторникот, Американската федерација на владини службеници (AFGE) и неколку други синдикати поднесоа тужба до Окружниот суд во Масачусетс, барајќи привремена забрана за поставениот краен рок – 6 февруари. Тие исто така инсистираат владата да формулира политика што е правно издржана, наместо, како што велат, „произволен, незаконски и брз ултиматум што работниците можеби нема да можат да го оспорат“.
Судско рочиште за случајот е закажано за денеска во 13:00 часот, по локално време.
Бројката од 40.000 вработени претставува околу два отсто од приближно два милиони федерални службеници на кои им била понудена оваа опција. Белата куќа соопшти дека нивната цел е меѓу 5% и 10% од вработените да поднесат оставки.
Според портпарол на OPM, се очекува значителен пораст на бројот на прифатени оставки во последните 24 до 48 часа пред истекот на рокот. Вработените својата согласност ја изразуваат преку одговор на електронската пошта од OPM или преку директни разговори со нивните претпоставени.
Некои федерални работници – вклучувајќи воен персонал, имиграциски службеници, одредени вработени во националната безбедност и службеници на Националниот одбор за транспортна безбедност – не се подобни за програмата. Но, вработените во Централната разузнавачка агенција (ЦИА) се.
Дополнително, OPM нуди дополнителни поволности за постарите федерални службеници преку програмата за доброволно рано пензионирање (VERA). Вработените што ќе се приклучат на програмата за одложена оставка мора да имаат најмалку 50 години и 20 години стаж или да бидат на која било возраст со минимум 25 години работен стаж.
Понудата за оставка беше испратена до федералните службеници на 28 јануари преку новиот масовен систем за е-пошта на администрацијата. Насловот „Кртосница на патот“ предизвика споредби со е-поштата што Икс (поранешен Twitter) ја испрати до своите вработени по преземањето од страна на Илон Маск. Маск, сега на чело на Одделот за владина ефикасност во администрацијата на Трамп, има мандат да го намали федералниот персонал.
Оваа иницијатива предизвика загриженост и конфузија кај многу вработени. Дополнителни информации беа објавени преку официјалната веб-страница на OPM и во последователна е-пошта, во која се објаснува дека вработените што ќе ја прифатат понудата нема да мора да продолжат со работа, освен во ретки случаи, дека ќе добијат целосна плата и покрај тоа што федералната влада е финансирана само до средината на март, и дека програмата е законска и валидна.
Оваа мерка е дел од пошироките напори на администрацијата на Трамп за трансформирање на федералната администрација, вклучувајќи намалување на бројот на вработени, заменување на кариерните службеници со политички назначени лица, укинување на некои заштити за јавните службеници и прекинување на програмите за разновидност.
Синдикатите на федералните службеници жестоко ја критикуваа администрацијата, обвинувајќи ја дека сака да го „испразни“ јавниот сектор и да го наполни со политички лојалисти.
„Нема сомнеж дека ако нападите што ги започна администрацијата на Трамп минатиот месец не бидат запрени, секој член на Конгресот наскоро ќе добие поплаки од гневни граѓани зошто нивните барања за бенефиции од ВА не се обработени или зошто нивните социјални пензии не се исплатени“, изјави претседателот на AFGE, Еверет Кели, во поднесок до Комитетот за надзор и одговорност на Претставничкиот дом.
Портпаролката на OPM, МекЛорин Пиновер, ги отфрли критиките на синдикатите, тврдејќи дека нивните лидери ги наведуваат работниците на погрешен пат.
„Синдикалните лидери и политичарите што им велат на федералните службеници да ја одбијат оваа понуда им прават огромна лоша услуга. Ова е ретка, дарежлива можност – темелно проверена и внимателно осмислена за да им помогне на вработените во процесот на реструктурирање“, изјави Пиновер во вторникот.
