Рускиот ракетен терор врз цивилите и цивилната инфраструктура низ Украина не запира и покрај вчерашните американско – украински мировни разговори, во кои Кијив прифати 30 дневно примирје. Во руските напади во текот на изминатиот ден низ Украина загинаа најмалку 14 цивили, а повредени се најмалку 33 , објавија регионалните власти на 12 март.
Како што пренесува Кијив индипендент, меѓу жртвите има деца и сириски членови на екипажот на трговскиот брод во Одеса.
Најмалку едно лице загина, а 10 се повредени за време на руските напади врз Днепропетровската област, објави гувернерот Серхи Лисак.
Серија експлозии беа пријавени во Криви Рих откако Русија изврши ракетен напад врз градот рано на 12 март. Една 47-годишна жена загина, додека други девет лица беа повредени, рече Лисак. Седум од нив се хоспитализирани, а тројца се во тешка состојба. Оштетени се високи згради, административни згради, автобуси, гаражи, автомобили, продавници, училиште.
Русија во текот на ноќта го нападна и регионалниот центар Днипро, при што рани 42-годишен маж, оштетени се 10 куќи, градинка, училиште и други згради, а избувна и пожари низ градот.
Според гувернерот Вадим Филашкин, во руските напади врз Донецката област изминатиот ден загинаа седум лица, а 13 беа повредени.
Ова вклучува три лица загинати и тројца повредени во Сиверск, двајца загинати и двајца повредени во Ривне, еден убиен и двајца повредени во Родинске, еден убиен и уште еден повреден во Покровск, четворица повредени во Костијантинивка и еден повреден во Молочарка, се наведува во соопштението.
Во Херсонската област, две лица загинаа, а седум се повредени, меѓу кои и две деца, според Олександр Прокудин, регионалниот гувернер. Оштетени се три висококатници, осум куќи, гасовод, комунални згради и автомобили.
Во текот на ноќта, Русија го погоди пристаништето во Одеса со балистичка ракета, оштетувајќи ја инфраструктурата и трговскиот брод MJ Pina под знамето на Барбадос, кој товареше пченица за извоз во Алжир, рече гувернерот Олех Кипер.
Загинаа четворица сириски членови на екипажот, на возраст меѓу 18 и 24 години, додека уште еден сириски член на екипажот и еден вработен во украинското пристаниште се повредени. Оштетени се и уште еден брод и магацини за жито.
Еден цивил беше повреден за време на нападите врз заедницата Миропилија во Сумиската област на 11 март, објави регионалната воена администрација.
Д. Мишев / Цивил Медиа
