Бројот на повредени во големиот руски напад со дронови врз Харкив се искачи на 21, соопштија итните служби.
Првично беа пријавени деветмина повредени, но локалните власти сега велат дека бројот на настрадани е повеќе од двојно зголемен.
Гувернерот Олех Синјехубов изјави дека во нападот биле оштетени семејни домови, станбена зграда, автомобили и производствена хала.
Руските сили доцна синоќа извршиле масовен напад со дронови врз Харкив, вториот по големина град во Украина. Службите за итни случаи на социјалните мрежи соопштија дека нападите предизвикале четири пожари во центарот на градот и објавија слики од пожарникари кои се борат со пламените јазици покрај купишта урнатини. Се наведува дека нападите предизвикале сериозни оштетувања на зградите.
Градоначалникот на Харкив, Ихор Терехов, изјави дека имало најмалку 12 напади со дронови врз градот кој е честа цел на руската војска, и се наоѓа на околу 30 километри од границата.
Харкив се одбрани од заземање во првите недели од почетокот на инвазијата на Русија врз Украина во февруари 2022 година, но често е цел на дронови и проектили.
