Британскиот премиер Кир Стармер изјави дека владата „се подготвила за сите евентуални можности“ и оти работи со компании кои најверојатно ќе бидат погодени од царините на американскиот претседател Доналд Трамп.
Се очекува Трамп да воведе царини за увоз на стоки од целиот свет во соопштение на Белата куќа во 16 часот.
Британските бизниси се подготвени за влијанието на царините на претседателот на „денот на ослободувањето“, кои имаат потенцијал да ги попречат надежите на британската влада за економски раст, пренесе ДПА.
– Дозволете ми да бидам јасен со Домот, трговска војна не е во ничии интереси и земјата заслужува – и ние ќе преземеме – мирен, прагматичен пристап, рече Стармер во парламентот одговарајќи на пратенички прашања.
– Затоа напредуваат конструктивните разговори за да се постигне договор за поширок економски просперитет со САД. Затоа работиме со сите индустрии и сектори кои веројатно ќе бидат погодени. Нашите одлуки секогаш ќе се водат од нашиот национален интерес и затоа се подготвивме за се што евентуално може да се случи и нема да исклучуваме ништо, рече Стармер.
Автомобилската индустрија веќе се соочи со царини од 25 проценти за возила извезени во САД – нешто што може да чини околу 25.000 работни места во Велика Британија.
Интензивните дипломатски напори и преговори за економски договор меѓу Велика Британија и САД не се очекува да бидат доволни за да се поштедат британските извозници од царинските планови на Трамп.
Воведувањето царини ќе ги поскапи британските стоки во САД, што веројатно ќе ја намали побарувачката.
