Министерството за образование и наука објави повик за полагање приемен испит на учениците кои се заинтересирани за запишување во Математичко-информатичката гимназија-Скопје (МИГ) во учебната 2025/2026 година.
Приемниот испит се состои од полагање тестови согласно наставните програми по Математика од VI до IX одделение и наставните програми по Физика за VIII и IX одделение.
На 4 јуни ќе биде испитот по Математика, а на 9 јуни по Физика. Испитите ќе се полагаат од 10 часот во просториите на средното училиште „Здравко Цветковски“, во времетраење од по 120 минути.
-Кандидатот/кандидатката писмено се проверува со два поединечни теста по математика и по физика и секој од нив треба да содржи по четири задачи со понудени одговори, четири задачи со дополнување и четири задачи со целосна постапка на решавање, се наведува во објавениот повик.
Заинтересираните ученици треба да пратат Писмо на интерес (кое е достапно за преземање во објавениот повик на веб-страницата на МОН) најдоцна до 30 мај 2025. Во повикот се наведени повеќе информации за начинот на пријавување.
Во Математичко-информатичката гимназија-Скопје може да се запишат редовни ученици кои основното образование го завршиле со оценка за општ успех од најмалку 4,5, од шесто до деветто одделение, и со оцена 5 по наставните предмети Математика од шесто до деветто одделение и Физика од осмо и деветто одделение и кои ќе достават потврда со бројот на освоени бодови од приемниот испит.
Според Конкурсот за запишување ученици во јавните средни училишта за учебната 2025/2026 година, за упис во прва година во Математичко-информатичката гимназија се предвидени 68 ученици во две паралелки – по 34 во паралелка со настава на македонски јазик и во паралелка со настава на албански јазик.
