Лидерката на екстремно десничарската Алтернатива за Германија (AфД) во четвртокот ги нарече царините „отров за слободната трговија“, неколку часа откако американскиот претседател Доналд Трамп најави огромни царини, пренесува ДПА.
Алис Вајдел, чија партија се додворуваше на поддршката од Трамп и неговиот советник Илон Маск во пресрет на германските избори на почетокот на оваа година, изјави за ДПА дека Соединетите Држави треба да бидат убедени дека договорот за тарифи ќе биде подобар од едностраните давачки.
„Не се работи за тоа дали тарифите се разбирливи или оправдани, туку за нивно спречување“, рече Вајдел.
Лидерката на екстремната десница претходно го пофали Трамп за неговата одбрана на американските национални интереси и политиката „Америка на прво место“.
Вајдел доби отворена поддршка од Маск и се состана со американскиот потпретседател Џеј Ди Венс на Минхенската безбедносна конференција во февруари, додека нејзиниот ко-лидер на АфД, Тино Чрупала, отпатува во Вашингтон на инаугурацијата на Трамп.
Американскиот претседател во средата објави сеопфатни царини од најмалку 10 отсто за сите стоки увезени во САД и повисоки давачки за некои земји. ЕУ се соочува со тарифи од 20 отсто за нејзините стоки.
Американските тарифи за европските производи беа критикувани и од Лајф-Ерик Холм, портпарол на АфД за економски прашања во германскиот парламент.
„Оваа одлука фрла песок во запчаниците на глобалната економија“, рече тој, повикувајќи на преговори за да се избегне трговска војна, наместо контрамерки.
Д .Мишев / Цивил Медиа
