Македонските ученици се враќаат од првиот Медитерански СТЕМ натпревар што денеска се одржа во Атина, со едно прво место, со награда за најдобро решение на понуден проблем, за најдобра соработка како тим, награда за најдобра прва автоматизација и за најдобра идеја и креативност, а имаа задача да наоѓаат решенија за преживување на Марс, јави дописничката на МИА од Атина.
По неколкучасовниот натпревар, односно презентација на решенијата за конкретната дадена проблематика и оцените од судиите, попладнево беа прогласени најдобрите, а меѓу нив и сите пет наши тимови, со по една награда за секоја тим, пет награди, што донесоа радост, насмевки и задоволство и кај ученици, но и кај нивниот тренер-едукатор и кај македонската СТЕМ Академија.
Македонските ученици, на возраст од осум до 12 години, се натпреваруваа во две категории, поделени во пет тима, два во помала и три во поголема категорија и имаа различни задачи и предизвици, за кои со помош на роботиката со лего коцки, требаше да најдат решенија на задачи како што се изградба на метеоролошка станица, создавање енергија, но и садење храна на Марс.
Тренерот-едукатор на македонските тимови Љупчо Јованов, изрази задоволство од постигнатиот успех, објаснувајќи дека подготовката била долготраен процес, односно околу три и пол месеци интензивна работа од четири-пет часа за време на викендите, а се користело претходното знаење на децата со лего коцки, со сензори, со мотори и сл. и дополнително бил воведен и микро бит за мерење на физички величини, читање на графички приказ и слично за да се добие решение на некој проблем.
– Премногу сум задоволен, се исплатеше три и пол месечниот труд што го вложивме како тимови, иако имавме одредени потешкотии на самото денешно презентирање, со техника и слично, меѓутоа на крај се покажа дека подготвеноста на децата да се снајдат со какви било проблеми вроди со плод, вроди со резултат. Сите тимови добија награди, тоа ни беше првично, првична цел кога тргнавме на натпреварувањето. Останува следната година да се подготвиме подобро, да решаваме уште подобри проблеми, истакна Јованов за МИА веднаш по соопштувањето на наградите.
Првата награда во нивната категорија ја освои тимот „Future stars“, односно Дамјан, Мила, Глигор, Алексеј кои беа задолжен за создавање метеоролошка станица на Марс за да ги заштита оние кои ќе живеат таму, а учениците иако видно задоволни и среќни, сепак скромно коментираат дека воопшто не се надевале на награда.
Темата на првиот Медитерански СТЕМ натпревар, што се очекува во иднина да стане традиционален, беше „Дали можеме да преживееме на Марс“, а како што објасни едукаторот Јованов, задачата на секој тим беше да формира проект што ќе реши даден проблем за да го населиме Марс.
– Секој тим одбра по една проблематика и во поголемата категорија, треба да направи две или четири автоматизации што вклучува мерење на некоја величина и вклучување на некој мотор за да изврши дадена задача. Во помалата категорија е малку поедноставно, бидејќи бараат само една автоматизација која вклучува мотор и еден сензор, а останатите се рачни механизми соодветно за возраста. Така што, мораше, кога се решаваа проблемите да има сеопфатен пристап за да можеме да изготвиме различни автоматизации и дополнително имавме ограничувања дека мора да користиме и видеокамера како сензор, микро бит кој ќе мери различни величини и сето тоа да биде прикажано со програмски код и да имаме дури за едното автоматизација и компјутерска анимација за да се видат вештините во програмирање на самите деца, објасни Јованов.
Директорот на македонската СТЕМ Академија Жарко Поп-Илиев, кој е дел и од бордот на директори на СТЕМ Асоцијацијата која го организира Медитерански натпревар, за МИА коментираше дека е навистина импресивно она што децата го научија во целиот процес на подготовки и напорна работа во изминатите три-четири месеци.
– Се користат најразновидни технологии, не е само лего, туку напротив многу open source технологија којашто е подостапна и поевтина во светски рамки. Се користат дополнителни напредни знаења, во овој случај на пример темата е „Како да се преживее на Марс?“, што е многу интересна тема. Децата прво правеа истражување околу темата, па потоа врз основа на тие истражувања осмислуваа одредени проекти, иновативни проекти коишто ќе ги презентираат и на крај ги прават проектите и секој проект треба да исполни одредени технички барања. Треба да одредени автоматизации, треба да има одредени роботски елементи итн. кои се предвидени од самиот организатор, објасни Поп-Илиев.
Во однос на наградите, иако во нивното 14-годишно постоење СТЕМ Академијата имаа низа меѓународни признанија, сепак директорот посочи дека постојат многу други и поважни работи со кои се стекнуваат децата.
– Пред сè, тука е учењето, искуството, соработката. Тоа се основните принципи врз кои се гради сето ова. Наградите, да, убави се, но доаѓаат како резултат на посветеност, а ние повеќе сме фокусирани на процесот отколку на тоа дали ќе се добие награда или не. Повредна е возбудата, тимската работа. Оние работи кои децата ги стекнуваат низ целото тоа, не само знаењето знаењето, туку и оние вештини за социјализација, за решавање на проблеми, критичкото расположение, самодоверба, бидејќи треба да презентираат пред судии, каде што треба да одговараат на прашања, да не се блокираат, тоа се многу елементи кои, барем за мене, се многу поважни, посочи Поп-Илиев.
Во однос на тоа колку роботиката е популарна кај нас, извршниот директор на СТЕМ Академијата објасни дека привлекува внимание меѓутоа потребно е да се работи на вистински начин, не е само да се работи туку да се работи со одредена методологија, на прав начин со искрени желби.
Медитеранскиот СТЕМ натпревар се одржа во просторот на саемот во северниот дел на Атина, а веднаш по свеченото отворање, учениците од земјите учеснички С. Македонија, Црна Гора, Бугарија, Либан, Кипар, Египет, како и домаќинот Грција, внимателно и посветено, во рамките на нивните тимови, работеа на дадената задача, додека судиите ненајавено ги посетуваат за да ги слушаат нивните објаснувања за понудените решенија.
