Народниот правобранител Насер Зибери упати честитка до граѓаните-припадници на ромската заедница кои живеат во Република Северна Македонија по повод 8 Април – Меѓународниот ден на Ромите, со надеж дека нивната интеграција во општетството ќе продолжи со позасилено темпо во наредниот период.
-Токму затоа, ги повикувам сите чинители во општеството да дадат максимални напори припадниците на оваа заедница, како една од најмаргинализираната, навремено, без никакви ограничувања да ги остваруваат сите со Устав и со закон загарантирани права, пишува Зибери во честитката.
Имено, Народниот правобранител како единствена институција која води сметка за заштита на уставното начело на недискриминација и соодветна и правична застапеност, констатира дека во последните три години има процес на застој во интегрирањето на оваа заедница во институциите (нивниот процент на вработување е речиси идентичен веќе три години наназад), овој број не одговара на нивната реална бројка во државата, па затоа во наредниот период истиот мора да почне да оди во нагорна линија.
-Државата во изминатиот период направи напори за интеграција на Ромите, со тоа што покрај одбележувањето на декадата на Ромите во периодот 2005-2015, продолжи и понатаму со нови активности во повеќе сензибилни области – образование, домување, вработување, но сепак застапеноста на оваа заедница во сите сфери не е на задоволително ниво. Припадниците на оваа заедница сѐ уште се најголемиот број од лицата кои имаат проблеми со запишувањето во матичната евиденција, што, пак, доведува до неможност да ги остваруваат сите други права – пристап до здравствената заштита, образование и слично, нагласува Зибери.
Тој посочува дека не е надминат ниту проблемот со сеграгацијата на учениците Роми во неколку градови во државата и покрај пресудата од Европскиот суд за човекови права и силните залагања на Народниот правобранител да престане овој најбрутален облик на дискриминација. Децата на улица, и натаму се најбројни од ромската заедница, а импровизираните домови како да станаа нивна реалност.
-Денес, овој ден го користам како прилика уште еднаш да истакнам дека како држава мора да бидеме подготвени сите овие недоследности во системот да ги надминеме и секојдневно да работиме на подобрување на положбата на оваа заедница во општеството. Со надеж дека следната година на овој ден ќе имаме сосема поинаква слика за нивната инеграција, уште еднаш упатувам честитка до сите припадници на ромската заедница, истакнува народниот правобранител, Насер Зибери.
