Министерот за одбрана на Соединетите Американски Држави, Пит Хегсет, наводно користел необезбедена интернет-врска во својата канцеларија во Пентагон за да ги заобиколи официјалните безбедносни протоколи и да ја користи апликацијата „Сигнал“ на персонален компјутер.
Според извештаите на Еј-Би-Си њуз, Хегсет користел таканаречена „валкана линија“ – комерцијална интернет врска што овозможува пристап до страници што се блокирани на класифицирани и некаласифицирани мрежи на Министерството за одбрана. Пентагон користи две одделни мрежи за пристап до интернет: „SiprNet“ за класифицирани информации и „NiprNet“ за јавна содржина.
Овој начин на пристап до интернет, надвор од официјалните системи, можел да ја загрози безбедноста на чувствителните податоци, изложувајќи ги на потенцијални кибер напади или надзор. Извори открија дека околу бирото на Хегсет во Пентагон имало три компјутери: личен компјутер, уред за класифицирани податоци и компјутер за чувствителни одбранбени информации. Ова е најновиот во низата извештаи што сугерираат дека Хегсет ја користел апликацијата „Сигнал“ за споделување класифицирани воени информации со тесен круг луѓе, пишува „Гардијан“.
Портпаролот на Пентагон, Шон Парнел, изјави дека може да потврди дека Хегсет никогаш не го користел и во моментов не го користи „Сигнал“ на својот службен компјутер. Порано оваа недела, „Гардијан“ потврди извештај на „Њујорк тајмс“ дека Хегсет споделувал оперативни информации за нападите врз Хутите во Јемен преку приватна група „Сигнал“ што ја создал за да комуницира со својата сопруга, брат, адвокат и девет блиски соработници.
Во 2016 година, коментирајќи за користењето на приватен сервер од страна на Хилари Клинтон за време на нејзиниот мандат како државен секретар, Хегсет изјави за „Фокс њуз“ дека секој професионалец во областа на безбедноста ќе биде „веднаш отпуштен и гонет“ за слично однесување.
