Светската програма за храна (ВФП) денеска објави дека ги „искористила сите залихи од храна“ за семејствата во Газа, бидејќи граничните премини се затворени од 2 март.
-ВФП денеска ги достави преостанатите залихи од храна во кујните што обезбедуваат топли оброци во Појасот Газа, соопшти агенцијата.
Тие изјавија дека се очекува овие кујни, кои претставуваат витална помош за половина од населението, обезбедувајќи 25 проценти од дневните потреби за храна, наскоро да останат без залихи.
Агенцијата на ОН истакнува дека сите 25 пекари што ги поддржувала биле затворени на 31 март откако снемало залихи од пченично брашно и гориво за готвење.
Пакетите со храна дистрибуирани до семејствата беа потрошени во текот на истата недела.
-Агенцијата предупреди за сериозен недостиг на безбедна вода и гориво за готвење, принудувајќи ги луѓето да бараат производи што можат да ги согорат за да подготват оброк, се вели во соопштението.
Газа се соочува со најдолгата блокада на нејзините главни гранични премини во историјата, без хуманитарни или комерцијални испораки повеќе од седум недели.
Светската програма за храна известува дека цените на храната се зголемиле за 1.400 проценти во споредба со времето на прекинот на огнот, додека основните потреби се во критичен недостиг, што предизвикува сериозна загриженост за исхраната кај ранливите групи, вклучувајќи ги малите деца, бремените жени и доилките и постарите лица.
Повеќе од 116.000 тони хуманитарна помош, доволно за да се прехранат еден милион луѓе за четири месеци, е подготвена да влезе во Газа штом повторно се отворат границите, соопшти агенцијата.
„Ситуацијата во Појасот Газа повторно достигна критична точка. Луѓето повеќе немаат средства да се справат“, предупреди Светската програма за храна.
Агенцијата, исто така, ги повика сите страни да „ги дадат приоритет на потребите на цивилите и веднаш да дозволат помошта да влезе во Газа, почитувајќи ги своите обврски според меѓународното хуманитарно право“.
