Додека Албанија го отвора третото поглавје во преговорите за членство во ЕУ, Косово се соочува со политичка криза и санкции од Европската Унија, пишуваат албанските и косовските медиуми.
Албанија е пред самиот почеток на парламентарните избори, а во Косово ниту по тринаесеттиот обид, не се конституира собранието.
Во продолжение се поместени сите содржини од денешниот редакциски избор на ЦивилМедиа, од албанските медиуми во регионот.
КОСОВО
Радио Косова е лире: Косово го одбележува Денот на Европа во услови на политичка криза и санкции
На 9 мај, Денот на Европа, Косово продолжува да биде без функционални институции и под казнени мерки од Европската Унија. Три месеци по изборите на 9 февруари, Собранието сè уште не е конституирано, а со тоа и новата влада не е формирана.
Директорката на движењето ФОЛ, Меџиде Демоли-Нимани, изјави дека оваа ситуација сериозно ѝ штети на посветеноста на Косово кон европската интеграција. Таа предупреди дека без формирана влада, санкциите на ЕУ нема да бидат укинати и дека Косово ризикува да заостане во процесот на членство во Советот на Европа.
Според неа, недостатокот на институционална стабилност го попречува напредокот кон европските институции, пренесе Радио Косова е лире.
Дукаѓини: Ниту тринаесеттиот обид за конституирање на собранието не успеа
Тринаесеттиот обид за конституирање на косовското собрание повторно не успеа, и покрај тоа што 56 пратеници гласаа за формирање на Комитетот со тајно гласање, додека еден пратеник гласаше против, а немаше воздржани.
Недостатокот на целосен кворум за донесување одлуки го оневозможи завршувањето на процесот, што дополнително го одложи конституирањето на Собранието.
По 13 обиди, Собранието останува неконституирано. Политичката блокада продолжува да останува на истата точка како и на претходните седници, пренесе Дукаѓини.
Следната седница е закажана за 11 мај во 10:00 часот.
ТВ 21: Владата го поздравува барањето на ЕП за укинување на мерките против Косово
Европската Унија не објави дали ќе го разгледа барањето на Европскиот парламент за укинување на казнените мерки против Косово, ниту какви дополнителни чекори мора да преземе Косово за да го постигне ова. Но, вршителката на должноста Влада на Косово изјави за РТВ21 дека мерките се одржуваат неправедно и дека тие треба да бидат укинати што е можно поскоро.
„Ја поздравуваме позицијата изразена од Европскиот парламент во врска со мерките против Косово во нивниот последен извештај, во кој се бара итно отстранување на мерките на Европската унија против нашата земја. Ова барање се додава на бројните претходни од самиот Европски парламент, но и на препораката на поранешниот висок претставник на ЕУ, Жозеп Борел, за нивно отстранување. Повторуваме дека одржувањето на казнените мерки против Косово останува неправедно. Тие мора да бидат отстранети што е можно поскоро, бидејќи беа неправедно наметнати и продолжуваат да се одржуваат неправедно“, изјави Кадиу за РТВ21.
Пред еден ден, Европскиот парламент одобри извештај во кој, меѓу другото, се бара итно укинување на казнените мерки против Косово, опишувајќи ги како неправедни и непотребни уште од нивното воведување.
АЛБАНИЈА
Јава њуз: Избори на 11 мај- државната полиција со план на мерки, 5316 полицајци на гласачките места
Државната полиција го објави планот на мерки што ги презеде за да го гарантира јавниот ред и безбедност за време на изборниот процес, како и за спречување, откривање и сузбивање на изборните криминали.
„Во соработка со ОБСЕ, ЦИК и Канцеларијата на генералниот обвинител, беа обучени 6.838 униформирани полицајци, како и 813 специјалисти за криминалистички истраги, кои беа ангажирани во истрагата на изборни кривични дела“, се вели во соопштението, пренесе Јава Њуз.
Газета Тема – Рама: ЕУ го формализираше отворањето на преговорите за третото поглавје, петтата меѓувладина конференција ќе се одржи на 22 мај
Премиерот Еди Рама, преку објава на Фејсбук, објави дека „Европската Унија го потврдува брзото темпо на членство на Албанија во Обединетото европско семејство и го формализира отворањето на преговорите за Група 3 од Поглавјето – „Конкурентност и инклузивен раст“, најавувајќи го одржувањето на Петтата меѓувладина конференција со Албанија на 22 мај 2025 година, во Брисел“, пренесе Газета Тема.
Шефот на владата нагласи дека остануваат да се отворат уште 11 групни поглавја.
„Денес, на Денот на Европа, Европската Унија го потврдува брзото темпо на членство на Албанија во Обединетото европско семејство и го формализира отворањето на преговорите за Група 3 од Поглавјето – „Конкурентност и инклузивен раст“, најавувајќи го одржувањето на Петтата меѓувладина конференција со Албанија на 22 мај 2025 година, во Брисел.
КОЛУМНА
Коха: „Изгубената војна на Русија“
„И денес, проблемот на Русија не е само тоа што ѝ недостасува воена моќ да ја наметне својата сфера на влијание. Нејзиниот проблем е што му недостасува каква било форма на моќ, вклучително и идеолошка моќ.
Барем за време на Студената војна, комунизмот на Советскиот Сојуз тврдеше дека нуди рај на земјата. Но, по падот на Берлинскиот ѕид, Москва повеќе не беше во можност да им понуди ниту идеологија, ниту безбедност, ниту просперитет на своите соседи. Можеше да понуди само национализам и руски свет, додека Источноевропејците, се разбира, немаа интерес да се жртвуваат за руските глупости. Ова е исто така причината зошто тие почнаа да бараат други решенија.
А другото решение беше само по себе очигледно: Соединетите Американски Држави и Западниот сојуз, едноставно со тоа што постоеја, едноставно со тоа што беа богати, моќни и демократски, нудеа одличен избор за земјите од Источна Европа.“, пишува Авторот Демуш Шаша во колумната “Изгубената војна на Русија“, објавена во косовскиот дневник Коха.
Подготви: Д. Тахири / Цивил Медиа
