Министрите за финансии и гувернерите на централните банки од Групата седум (Г7) водечки економии ветија дека ќе работат заедно за да ги стабилизираат глобалните пазари.
Во завршна декларација издадена синоќа, највисоките финансиски претставници на Г7 изјавија дека имаат за цел да остварат заеднички политички цели во услови на сложени глобални предизвици.
Состанокот, одржан во канадскиот туристички град Банф, беше опишан како „продуктивна и искрена размена на мислења за глобалната економија, неодржливите глобални дисбаланси и начините за промовирање на раст и продуктивност“.
Во соопштението беше забележано дека иако неизвесноста во трговската и економската политика донекаде се намали, потребна е одржлива соработка за да се зачува напредокот.
– Мораме да продолжиме да соработуваме за да се справиме со заедничките предизвици, да обезбедиме силен и стабилен глобален раст и да ги постигнеме нашите заеднички цели, рече канадскиот министер за финансии Франсоа-Филип Шампањ.
Членки на Г7 се Германија, Франција, Велика Британија, Италија, Јапонија, Канада и САД.
Во услови на тензии околу агресивниот став на Вашингтон за царини, првично беше нејасно дали ќе биде можно заедничко соопштение.
Сепак, беше договорено соопштение, кое исто така силно ја осуди тековната војна на Русија против Украина, потврдувајќи ја непоколебливата поддршка на Г7 за Киев, пренесе ДПА.
