Крајнодесничарската Партија за слобода (PVV) ја напушта холандската влада поради нејзината политика за барателите на азил, изјави нејзиниот лидер Герт Вилдерс во вторник, со што ја собори владината коалиција, пренесува Си-ен-ен.
„Се согласив за најстрогата политика за азил, а не за пропаст на Холандија“, изјави Вилдерс пред новинарите во вторникот наутро. „И затоа нашата одговорност за овој кабинет завршува тука.“
Падот на владината коалиција, најдесничарската во холандската историја, значи дека земјата веројатно ќе се соочи со нови избори во наредните месеци.
PVV на Вилдерс беше јасен победник на изборите во ноември 2023 година. Но, коалицискиот договор постигнат по месеци пазарење диктираше дека, иако неговата партија ќе се приклучи на владата, тој ќе остане на маргините, во парламентот.
Премиерот на земјата, Дик Шуф, кој се судри со Вилдерс околу политиката, сè уште не коментираше за повлекувањето на поддршката од PVV.
Лидерот на холандската крајна десница Герт Вилдерс има долга историја на антиисламска и антиимигрантска реторика. Тој беше осуден за дискриминација откако ги навреди мароканските имигранти на предизборен митинг во 2014 година, а неговата партија повикува на Холандија „без исламски училишта, Курани и џамии“.
Д. Мишев / Цивил Медиа
