Првите слики од јужниот пол на Сонцето, објавени во средата од Европската вселенска агенција (ESA), откриваат хаотичен сплет од магнетни активности во регион што досега никогаш не бил набљудуван.
Сликите се снимени од вселенското летало Solar Orbiter, заедничка мисија на ESA и НАСА, и отвораат нови перспективи за разбирање на однесувањето на Сонцето, неговото магнетно поле и влијанието врз вселенското време.
„Сонцето е нашата најблиска ѕвезда, извор на живот, но и потенцијален нарушувач на модерните системи за електрична енергија и комуникации. Затоа е клучно да разбереме како функционира и да научиме да го предвидуваме неговото однесување,“ изјави Карол Мандел, директорка за наука во ESA. „Овие уникатни нови снимки се почеток на нова ера во хелиофизиката.“
Снимките покажуваат турбулентни магнетни процеси на јужниот пол, токму во период кога Сонцето се приближува до максимумот на својата 11-годишна активна фаза. Во текот на овој т.н. соларен максимум, магнетните полиња на Сонцето се менуваат – јужниот станува северен и обратно. Точниот механизам зад оваа смена сè уште не е целосно разјаснет.
Научниците откриле дека во моментов на јужниот пол се присутни и северна и јужна магнетна поларност – состојба која ќе трае кратко, додека не дојде до целосно „превртување“ на магнетното поле.
„Како точно се гради повторно еднородна поларност е нешто што сè уште не го разбираме целосно,“ вели проф. Сами Соланки од Институтот Макс Планк за истражување на Сончевиот систем и водечки научник на PHI-инструментот на Solar Orbiter, кој го мапира магнетното поле на сончевата површина.
Иако и досега постоеја детални снимки од Сонцето, сите биле направени од региони блиску до екваторот. Но, Solar Orbiter користеше гравитациски маневри околу Венера за да ја измени својата орбита и да се издигне над сончевата рамнина, овозможувајќи прв директен поглед кон поларните региони.
Новите слики се направени во март, кога леталото било на 15, па на 17 степени под екваторот – доволно високо за директна опсервација на јужниот пол.
„Навистина не знаевме што да очекуваме – поларните региони на Сонцето се вистинска непозната територија,“ вели Соланки.
Мисијата беше лансирана во февруари 2020, а во наредните години се очекува Solar Orbiter да достигне уште повисоки „географски широчини“ на Сонцето, со што ќе овозможи уште подобри снимки од поларните региони.
„Овие податоци ќе го трансформираат нашето разбирање за магнетното поле на Сонцето, соларниот ветер и сончевата активност,“ изјави Даниел Милер, главен научник за проектот Solar Orbiter во ESA.
Редакција Фронтлајн
