Авион на „Луфтханза“ кој летал од Франкфурт до Индија бил принуден да се врати вчера поради закана за поставена бомба, изјавија од германската федерална полиција за ДПА.
Одделот за корпоративна безбедност на „Луфтханза“ ја предупредил полицијата за заканата, по што авионот се вратил во Франкфурт на Мајна, каде што безбедно слетал околу 18:30 часот по локално време.
Авионот LH752 бил на пат кон градот Хајдерабад и се вратил додека летал над бугарскиот воздушен простор.
„Слетувањето во Индија не било одобрено поради заканата за поставена бомба, па затоа авионот морал да се врати“, изјави портпарол на полицијата.
„Луфтханза“ го потврди враќањето на летот, но одби да коментира понатаму за инцидентот. Патниците на авионот морале да ја поминат ноќта во транзитната зона на аеродромот.
