Претставникот на ВЛЕН, Фатмир Сабриу, денеска соопшти дека оваа коалиција ќе поднесе кривична пријава до Основното јавно обвинителство – Скопје против, како што рече, „тогашното раководство на Државниот завод за статистика, одговорни лица во поранешната Влада предводена од ДУИ и СДСМ, како и други лица со моќ на договарање во тогашната политичка власт“.
Сабриу посочи дека причината за пријавата е сериозен сомнеж за „политичко договарање и следствено на тоа фалсификување на резултатите од Пописот во 2021 година“.
„Се сомневаме дека е извршено кривично дело Злоупотреба на службена положба и овластување, согласно член 353 од Кривичниот законик,“ рече Сабриу.
Тој нагласи дека, според нивните наоди, последиците од пописот се „далекусежни“, со драстично и свесно намалување на бројот на Албанци во многу села, населени места и градови ширум државата.
„Со тоа Албанците лично и поединечно губат многу права гарантирани со Уставот – како што се вработувања, политичка застапеност и јазична еднаквост. Но и институциите се доведени во ситуација да одлучуваат за намена на средства и фондови по погрешни и намалени бројки, со што повторно се оштетени граѓаните во многу општини,“ изјави Сабриу.
Од ВЛЕН побараа од Јавното обвинителство да ги испита наводите, додавајќи дека деновиве „високи функционери на ДУИ јавно признаа дека ‘пописот бил во рамки на договореното’, што уште повеќе го поткрепува сомнежот за политичка режија на целата операција“.
„ВЛЕН ја презема оваа иницијатива во одбрана на законитоста, еднаквоста и реалната статистичка слика на државата. Очекуваме ОЈО итно да отвори предмет, да ги обезбеди сите материјални докази и да спроведе темелна истрага,“ додаде Сабриу.
Тој заврши со порака дека борбата за вистината допрва започнува:
„Нема компромис кога се повредува достоинството и бројноста на нашата заедница. Борбата за вистината започнува сега – и ќе ја истуркаме до крај, во интерес на сите граѓани на Република Северна Македонија.“
