Милијардерот и претприемач Илон Маск првпат јавно се огласи по усвојувањето на буџетскиот закон на американскиот претседател Доналд Трамп, познат како „Еден голем прекрасен закон”, кој вчера беше изгласан во двата дома на Конгресот.
Маск, на својата социјална мрежа Икс, денеска повторно го отвори прашањето за формирање на трета политичка партија во САД, како алтернатива на Демократите и Републиканците.
Independence Day is the perfect time to ask if you want independence from the two-party (some would say uniparty) system!
Should we create the America Party?
— Elon Musk (@elonmusk) July 4, 2025
„Денот на независноста е совршено време да се прашаме дали сакате независност од двопартискиот (некои би рекле еднопартиски) систем! Дали да ја создадеме Американската партија?”, напиша тој, придружувајќи ја пораката со интерактивна анкета.
Маск тврди дека двете главни партии повеќе не ги застапуваат интересите на она што го нарекува “80 проценти во средината” – проценка што, според него, ги опфаќа умерените и независните гласачи кои не се идентификуваат со крајните политички позиции.
Идејата за нова партија дојде по јавниот конфликт со Трамп околу „Еден голем прекрасен закон”, кој предвидува трајно продолжување на даночните олеснувања од 2017 година, зголемување на долгот за пет трилиони долари и дополнителни 3,3 трилиони долари на дефицитот, според невладина анализа на Конгресниот буџетски одбор.
Законот предвидува и скратувања на социјалните услуги, како Медикејд и програмата за помош со храна (SNAP), што предизвика противење кај некои републиканци и демократи, пренесува Ал Џезира.
Маск индиректно ги повтори своите критики кон законот, реобјавувајќи го коментарот на сенаторот Ренд Пол дека законот ќе доведе до „експлозија на дефицитот за краток рок”, додавајќи емотикон со “100” за да ја изрази целосната согласност. Тој претходно го напушти советничкото место во администрацијата на Трамп, изразувајќи разочарување од зголемувањето на дефицитот.
По заминувањето, Маск ги заостри нападите, наведувајќи дека законот е „одвратна спротивност” и дури сугерирајќи импичмент за Трамп, како и наводни информации за врските на претседателот со осудениот сексуален престапник Џефри Епстајн, без да достави докази (објавите подоцна беа избришани). Трамп, пак, го обвини Маск за „лудо” однесување, поврзувајќи го со намалувањето на владините субвенции за електрични возила.
Маск, чие богатство од 361 милијарда долари според индексот на „Блумберг”, му дава финансиска моќ, предложи партијата да се вика “Американска партија” и планира да се фокусира на неколку клучни места во Сенатот и Претставничкиот дом за да влијае на тесните мнозинства.
Експерти, меѓутоа, предупредуваат дека трети партии ретко успеваат во двопартискиот систем на САД и можат да го ослабнат гласањето за посилни кандидати. Според истражувањето на „Галуп” од јануари 2025, 43 отсто од Американците се идентификуваат како независни, што е рекорд, но процентот на умерени опадна на 34 отсто во 2024 година, доведувајќи ја во прашање проценката на Маск за „80 проценти во средината”.
Трамп се очекува да го потпише законот денеска на специјална церемонија во Белата куќа.
