Рашко-призренската епархија на Српската православна црква во Косово ги негираше обвинувањата дека Црквата води преговори со косовските институции за „фундаментален договор“.
„Ниту еден текст, нацрт или предлог што се однесува на прашањето за статусот на Српската православна црква како „договорна страна“ во односите со Владата на Косово никогаш не постоел, ниту е предмет на разгледување од страна на кое било црковно тело, ниту пак некогаш му бил презентиран на Неговата Светост, Патријархот или на Рашко-призренската епархија“, се наведува во соопштението на епархијата објавено утрово.
„Сугестијата дека Црквата би прифатила таков договор за да се отвори патот за формирање на „Косовска православна црква“, која во иднина би ги „презела српските свети места“, претставува исклучително бесрамна клевета против нашата Црква.“
Десничарската партија во Србија, Движењето за обнова на Кралството Србија (ПОКС), на 30 јули ја повика Српската православна црква да не го прифати основниот договор што го нудат косовските институции, во согласност со договорот за нормализација на односите меѓу Косово и Србија.
ПОКС е дел од пратеничката група во српскиот парламент, во рамките на коалицијата НАДА.
Во меѓувреме, на 31 јули, седиштето на Српската православна црква во Белград ги негираше овие обвинувања, истакнувајќи дека правната позиција на Српската православна црква во Косово не е предмет на преговори и дека Српската православна црква не може „да биде дел од никакви преговори и политички договори за статусот на Косово“.
Преземено: Цивил Медиа
