Француските синдикати денеска најавија дека на 18 септември ќе организираат протести и штрајкови против фискалните планови на Владата во Париз, која подготвува значителни буџетски кратења.
– Нашите организации повикуваат на акција на 18 септември, што подразбира штрајкови и протестни собири, изјави лидерката на најголемиот синдикат ЦФДТ, Матилд Леон, по состанокот на осум големи синдикати.
Таа додаде дека нацрт-буџетот на Франција, кој го оцени како „страшен“, мора да биде повлечен.
Неколку други организации преку социјалните мрежи најавија уште еден бран протести и штрајкови на 10 септември.
Аналитичари ја споредуваат ситуацијата со 2018 година, кога протестите против зголемувањето на цените на горивата и трошоците за живот се претворија во поширокото движење „Жолти елеци“ против претседателот Емануел Макрон и неговите економски реформи.
Францускиот премиер Франсоа Бајру претходно закажа гласање за доверба на владата на 8 септември, комбинирано со поддршка за буџетските кратења. Трите најголеми опозициски партии веќе најавија дека ќе гласаат против, пренесоа медиумите.
