Речиси три четвртини од германските болници минатата година завршиле со загуба, покажува годишното истражување на консултантската куќа „Роланд Бергер“.
Анкетата спроведена меѓу 850 директори и менаџери на болници покажала дека околу 75 отсто од установите биле во минус во 2024 година, што е значително повеќе во споредба со претходната година кога половината сè уште работеле профитабилно. Најтешко се погодени јавните болници, од кои речиси 90 проценти пријавиле дефицит.
– Бројот на болници со негативни резултати постојано расте, додека профитабилните стануваат се помалку, предупреди здравствениот експерт Петер Магуниа. Според него, кај дел од установите загубите надминуваат 100 милиони евра, што ги доведува во тешка ситуација и силните општински оператори, пренесува ДПА.
И покрај големиот притисок, бројот на стечаи е помал од очекуваното, бидејќи локалните власти пренасочуваат средства за да ги одржат болниците во функција. Сепак, се очекуваат нови спојувања и затворања, а многу установи веќе прават реорганизација – со намалување на бројот на локации, ограничување на услугите и поголем фокус на амбулантната грижа.
Според проценките, германските болници ќе имаат потреба од околу 130 милијарди евра инвестиции за изградба, ИТ и дигитализација во наредните години, што далеку го надминува достапното финансирање, иако федералната влада обезбеди 50 милијарди евра преку фонд за трансформација на здравството.
Иако менаџерите очекуваат натамошно влошување на состојбата на краток рок, „Роланд Бергер“ оценува дека на подолг рок постои внимателен оптимизам за закрепнување – но не и сигурно враќање кон профитабилност.
