Велика Британија им забрани на израелски владини претставници да учествуваат на најголемиот саем за одбранбена техника во земјата, поради ескалацијата на војната против Хамас во Појасот Газа.
Одлуката е дел од притисокот врз Израел, иако Лондон и Тел Авив традиционално имаат блиски односи, јави ДПА.
Поради ограничувањата, израелското Министерство за одбрана најави дека нема да организира национален павилјон на саемот „Defence and Security Equipment International (DSEI)“ во Лондон, кој почнува на 9 септември.
Израелски компании како „Елбит системс“, „Рафаел“, „Израел аероспејс индустрис“ и „Јувижн“ (Uvision) сепак ќе можат да учествуваат.
Британската влада оцени дека одлуката на Израел да ја засили воената операција во Газа била „грешка“.
– Ниту една израелска владина делегација нема да добие покана за настанот, изјави портпарол на британското Министерство за одбрана, додавајќи дека потребно е итно примирје, враќање на заложниците и зголемување на хуманитарната помош.
Израел го осуди потегот како „чин на дискриминација“ и „политичка одлука недостојна за професионален саем“.
Четиридневниот саем ќе се одржи во лондонскиот центар „Excel“, со учество на национални делегации и компании од одбранбената индустрија.
