Една од најголемите и највлијателни поп-рок групи на Балканот, Бајага и Инструктори, пристигнува во Струмица на 7 септември за да го одбележи својот голем јубилеј – 40 години кариера. Нивниот настап е дел од Get EXITed забавата, која ќе се одржи во Големиот градски парк, каде се очекуваат илјадници фанови желни за безвременски рокенрол химни.
Откако минатата година величествено одбележаа четири децении постоење, бендот ја продолжува својата турнеја, носејќи ја препознатливата енергија и страст што ги прави еден од најдолговечните и најомилени состави во регионот.
Патот на групата започнува во 1984 година, кога срамежливиот гитарист и член на „Рибља Чорба“, Момчило Бајагиќ Бајага, го издаде деби албумот „Позитивна географија“. Иако малкумина веруваа во успех, албумот донесе хитови како „Мали слонови“, „Текила-Герила“ и „Берлин“, кои веднаш ја освоија публиката со својот ведар дух.
Само пет години подоцна, со четири објавени албуми и бројни хитови како „Ти се љубиш“, „Од другата страна на перницата“ и „Руски воз“, Бајага и Инструктори веќе имаа статус на култна група. Нивната музика продолжи да се развива низ годините, а албумите како „Музика на струја“ и „Змеј од Ноќај“ покажаа дека бендот умее да експериментира, но секогаш останувајќи верен на својот уникатен стил.
Концертите низ цела Европа, па дури и во Њујорк, покажаа дека нивната музика ги надминува границите и дека Бајага и Инструктори се вистински регионален и меѓународен феномен.
Бајага се позиционираше како еден од најважните автори на овие простори, со над 170 напишани песни, од кои многу станаа хитови во изведба на други артисти. Негови композиции, како „Моја драга“ и „Твоите очи“, станаа евергрини во репертоарот на Здравко Чолиќ, додека „Отворена врата“ беше голем хит на Бисера Велетанлиќ.
Со 11 студиски албуми и десетици синглови, Бајага и Инструктори денес претставуваат еден од најплодните состави на регионалната сцена. Нивната музика одамна ги надмина музичките трендови и стана дел од колективната меморија на генерации.
Настапот на Бајага и Инструктори на Get EXITed забавата во Струмица ќе биде потврда дека рокенролот сè уште живее, обединувајќи ги сите генерации во една иста енергија и заедништво.
