Израелскиот премиер Бенјамин Нетанјаху денеска на почетокот од неговото судење за корупција потврди дека Израел започнал „интензивна операција во градот Газа“.
Нетанјаху ја даде изјавата како дел од барањето да биде ослободен од неговото редовно закажано сведочење поради, како што рече, „важни работи што се случуваат“, објави „Тајмс оф Израел“. Израелскиот премиер не ги прецизираше деталите за операцијата.
Претходно израелски воен функционер, само неколку часа откако американскиот државен секретар се сретна со израелскиот премиер Бенјамин Нетанјаху во Ерусалим и му рече дека Вашингтон стои зад Израел потврди дека Израел започна операција за преземање на контролата врз Газа.
Воениот функционер рече дека армијата е подготвена да дејствува во Газа „колку што е потребно“ за да го победи Хамас, проценувајќи дека има илјадници терористи од исламистичката организација во Газа.
Тој рече дека Израел ќе го зголеми бројот на војници во Газа.
Тој, исто така, процени дека околу 40 проценти од населението веќе се преселило на југ, нагласувајќи дека Израел продолжува да ги проширува своите „хуманитарни напори“ во Газа, особено на југ.
Израелските одбранбени сили дадоа малку почетни детали, но рекоа дека нивните војници почнале „да ја уништуваат терористичката инфраструктура на Хамас во Газа“, главниот урбан центар на енклавата, од каде што Израел им нареди на стотици илјади жители да избегаат.
-Газа е во пламен, објави министерот за одбрана Израел Кац, ветувајќи дека Израел нема да попушти ниту да се откаже „сè додека мисијата не биде завршена“.
Нетанјаху денеска изјави дека Израел започнал „значајна“ операција во Газа.
Израелски воени авиони извршиле речиси континуирани напади врз Газа во текот на ноќта, придружени со артилериски оган, објавија палестинските медиуми.
Палестинските медиуми објавија дека тенковите подоцна влегле во градот, каде што се верува дека има уште стотици илјади луѓе. Израелската војска не го потврди ова.
Американскиот државен секретар Марко Рубио денеска предупреди дека Хамас има само неколку дена да се согласи на договор за прекин на огнот, бидејќи Израел започна особено тешки напади врз градот Газа.
-Израелците започнаа операции таму. Затоа веруваме дека имаме многу краток временски период за да постигнеме договор со палестинската исламистичка група, им рече тој на новинарите.
На крајот од посетата на Израел, по која отиде во Катар, Рубио рече дека веројатно остануваат само „неколку дена, или можеби неколку недели“.
