Кандидатот за градоначалник на Општина Чаир од редовите на ВЛЕН, Изет Меџити, денеска го претстави еден од најважните проекти за јавната безбедност на граѓаните, изградбата на Територијалната противпожарна станица во срцето на оваа општина, стои во соопштението на Коалиција ВРЕДИ што МИА го пренесува интегрално.
Во своето обраќање, Меџити истакна дека овој проект не е луксуз, туку животна потреба, со цел справување со сè почестите ризици од пожари, како во летниот, така и во зимскиот период.
„Брзата интервенција спасува животи. Оваа станица не е само инфраструктурен проект, туку директна инвестиција во животот и благосостојбата на нашите граѓани“, изјави Меџити.
Проектот опфаќа модерен објект со површина од 750 м², 3 противпожарни возила опремени за интервенции на секаков терен, како и 12 професионални пожарникари, обучени и подготвени да реагираат во секоја итна ситуација.
„Секогаш сме имале тивки херои, пожарникарите кои го ризикувале својот живот за да ги спасат другите,“ додаде Меџити.
Меџити упати и посебна благодарност до Доброволното противпожарно друштво „Бајрам Мифтари“ од Чаир, кое со години претставува хуман столб на безбедноста, не само во Чаир, туку и пошироко.
Оваа станица ќе претставува уште еден камен во мозаикот на јавната безбедност во Чаир и ќе има директно влијание врз намалување на материјалната штета и спасување на човечки животи.
„Чаир заслужува модерна инфраструктура, ефикасни услуги и безбедност. Оваа станица значи повеќе спасени животи, помалку штети и поголема институционална одговорност.
Имаме искуство и капацитет да го реализираме овој проект и ќе го направиме тоа заедно со граѓаните, професионалците и нашите институционални партнери“, заклучи тој.
