Канцеларијата на израелскиот премиер им нареди на Израелските одбранбени сили (ИДФ) да го емитуваат говорот на премиерот Бенјамин Нетанјаху на Генералното собрание на ОН во живо за жителите на Појасот Газа, објави „Тајмс оф Израел“.
По извештајот утрово во израелските медиуми дека на ИДФ им е наредено да инсталираат звучници на камиони низ Појасот Газа, Канцеларијата на премиерот потврди дека планира да го емитува говорот во живо за жителите на Газа, но нагласи дека тоа ќе се прави само од израелската страна на границата.
-Канцеларијата на премиерот им наложи на цивилните институции, во координација со ИДФ, да инсталираат звучници на камиони само на израелската страна од границата со Газа, со цел да се емитува историскиот говор на премиерот Нетанјаху на Генералното собрание на ОН во Појасот Газа денеска“.
Овој потег е дел од „дипломатски пристап кон јавноста“, соопшти канцеларијата на премиерот, истакнувајќи дека премиерот „конкретно наредил операцијата да не ги загрозува израелските војници“.
Според претходен извештај медиумите, војската изразила противење на наредбата бидејќи таа би барала од војниците да се оддалечат од своите позиции и да влезат во делови од Појасот Газа каде што се изложени на поголем ризик од напад од Хамас.
-Тоа е луда идеја, изјави висок воен функционер за израелски „Хаарец“. „Луѓето од целиот политички спектар прашуваат: „Каква заблуда е ова?“ Никој не разбира каква воена корист може да има“, рече тој.
Весникот објави дека, и покрај противењето, војската нема да го одбие барањето на кабинетот на премиерот и се подготвува да го емитува говорот на Нетанјаху низ цела Газа.
Говорот на премиерот е закажан да започне во 16 часот по израелско време и се очекува да се фокусира главно на остра критика за признавањето од Западот на независна палестинска држава.
