Литванија, Летонија и Естонија развиваат координирани акциски планови за масовна евакуација на населението во случај на можен руски напад или внатрешни немири.
Информацијата ја потврдија извори од балтичките влади, нагласувајќи ја потребата од координирани чекори за брза мобилизација на населението и ефикасно управување со логистиката.
Според официјални извори, трите земји подолго време ја нагласуваат загриженоста поради потенцијални кибер напади, кампањи за дезинформации и можни упади на руски борци и дронови кои би можеле да влијаат на регионалната безбедност.
Естонскиот советник за масовна евакуација, Ивар Мај, го сврте вниманието на ризикот од коридорот Сувалки, истакнувајќи дека руските сили би можеле да се обидат да ги изолираат балтичките земји од нивната единствена надворешна граница со НАТО – Полска.
Се дискутира за можноста за брза мобилизација на населението до рутите за евакуација и соодветните собирни места, по што ќе се координира транспортот и логистиката за да се обезбеди непречено движење на луѓето.
Исто така, се разгледуваат сценарија кои вклучуваат масовен прилив на мигранти, социјални немири меѓу рускојазичните заедници или ширење на дезинформациски пораки што би можеле да доведат до масовен егзодус.
Во Литванија, еден од учесниците на обуката, 31-годишниот волонтер Арминас Раудис, рече дека ризиците се дискутираат месечно и неделно. Според Ренатас Позеле, фокусот е ставен на околу 400.000 луѓе кои живеат во радиус од приближно 40 километри од границите со Русија и Белорусија.
Градот Каунас планира да смести околу 300.000 луѓе во училишта, универзитети, цркви и локалната арена.
„Ова е многу смирувачка вест за нашето општество дека сме подготвени и планираме… Ја завршивме домашната задача“, се наведува во извештајот.
Деталните планови за евакуација на граѓаните во моментов во странство не се откриваат, а земјите остануваат фокусирани на внатрешната координација и поддршка на населението во кризни ситуации, пренесе МИА.
