Американскиот претседател Доналд Трамп денеска му честиташе на аргентинскиот претседател Хавиер Милеј на убедливата победа на среднорочните парламентарни избори одржани вчера, на кои неговата партија освои нешто повеќе од 40 проценти од националните гласови.
„Честитки до претседателот Хавиер Милеј за убедливата победа во Аргентина. Тој одлично ја врши работата! Аргентинскиот народ ја оправда нашата доверба во него“, напиша Трамп утрово на мрежата Truth Social.
Милеј синоќа ја објави победата на својата партија на парламентарните избори и нагласи дека, како што изјави, оваа голема победа означува пресвртница, ветувајќи дека ќе продолжи со реформите што неговата влада ги смета за неопходни.
Неговата нова партија, La Libertad Avanza, освои повеќе од 40 проценти од гласовите на вчерашните избори, во споредба со 31 процент за левичарската опозициска перонистичка коалиција.
По објавувањето на резултатите, Милеј изјави дека гласачите покажале желба неповратно да го променат патот на напредокот за втората по големина економија во Јужна Америка, пренесуваат британските меидуми.
Во седиштето на неговата партија, Милеј го поздрави изборниот триумф како „зелено светло“ за продолжување на намалувањето на трошоците и воведување амбициозни даночни и работнички реформи.
Резултатите, исто така, автоматски го позиционираат како кандидат за реизбор во 2027 година.
„Аргентинскиот народ одлучи да остави зад себе 100 години декаденција. Денеска започнуваме со изградбата на голема Аргентина“, им рече Милеј на своите поддржувачи.
Британските медиуми пренесуваат дека победата на Милеј е израз на јавната доверба што ја зајакнува неговата способност да спроведе радикален експеримент за слободен пазар поддржан од неколку десетици милијарди долари од администрацијата на американскиот претседател Доналд Трамп.
Аргентинските гласачи избраа 257 пратеници во Долниот дом на парламентот, како и 24 членови на Сенатот, кој има вкупно 72 пратеници.
Изборите се одржаа во атмосфера на политичка и економска криза, како и обвинувања дека сојузникот на радикалниот лидер Хавиер Милеј, американскиот претседател Доналд Трамп, се меша во внатрешните работи на земјата, објави претходно „Гардијан“.
