За Предлог-буџетот за 2026 година, СДСМ реагира со остра критика, обвинувајќи ја Владата за, како што велат, „фискална неодговорност и економска неспособност“.
„Наместо ветената строга фискална дисциплина, Владата предлага дефицит од 3,5% од БДП и со тоа повторно директно го прекршува фискалното правило утврдено во Законот за буџети, кое поставува лимит од 3%. Не станува збор за дисциплина, туку за отстапување од законската рамка што ќе ја платат граѓаните и економијата,“ стои во соопштението.
Од партијата оценуваат дека буџетската рамка од 374,7 милијарди денари приходи и 413,9 милијарди денари расходи е погрешно наречена „развојна“, бидејќи истовремено се кратат капиталните инвестиции.
„Со предлог-буџетот за 2026 година тие се планираат на 40,5 милијарди денари – речиси 7 милијарди помалку од 47,3 милијарди денари утврдени со ребалансот за 2025 година,“ наведуваат од СДСМ.
Според нив, ниската реализација на капиталните расходи уште еднаш го потврдува неспроведувањето на ветените проекти:
„На денот на усвојување на предлог-буџетот, реализацијата на капиталните расходи изнесува само 44,94%. Со екстремно слаба реализација, тврдењето дека капиталните проекти ќе бидат главен двигател на растот во 2026 година е контрадикторно и признание за неспособност.“
СДСМ ја критикува и проекцијата за раст на БДП од 3,8%, оценувајќи дека се темели на потрошувачка, а не на инвестиции:
„Кога растот е базиран на зголемување на плати и пензии во услови на намалени капитални расходи и отсуство на структурни реформи, тогаш оправдано се поставува прашањето: дали се најавува уште една година во која економските промашувања се маскираат со краткорочни, популистички потези?“
Од опозициската партија предупредуваат дека ваквата буџетска стратегија ќе предизвика „повисоки трошоци за камати, ново задолжување, притисок врз даноците и истиснување на продуктивните инвестиции“.
„Загрозената продуктивност на стопанството ќе донесе само повисоки цени на услуги и производи, односно намалена можност за реално зголемување на животниот стандард на граѓаните. Зголемените плати и пензии ќе потонат во растечката месечна потрошувачка за основните животни потреби,“ порачуваат од СДСМ.
Заклучокот на партијата е дека предложениот буџет не нуди економски развој:
„Со Предлог-буџетот за 2026 година Владата не нуди развој, туку маска за економски промашувања,“ завршува соопштението на СДСМ.
