Претседателот на Социјалдемократскиот сојуз на Македонија, д-р Венко Филипче, на денешната прес-конференција по завршувањето на вториот круг од локалните избори, најави сериозни кадровски и политички промени во рамки на партијата.
„Овие избори се јасен патоказ за СДСМ, а секако и јасен патоказ за мене како претседател на партијата јасно е какви промени треба да се направат, и политички и кадровски. Како што веќе најавив, во следните денови ќе следуваат промени. Ќе се одржат седници на Извршниот и на Централниот одбор на кои ќе бидат презентирани и усвоени тие кадровски решенија,“ рече Филипче.
Претседателот Филипче исто така најави и дека партијата ќе свика Конгрес на кој ќе се разговара за идните политики и насоката во која СДСМ ќе се движи во следниот период.
Филипче, истакна дека не размислува за оставка бидејќи е на функцијата кратко време.
Тој потврди дека потпретседателката Ана Чупеска поднела оставка, а во однос на прашањето дали се најавени други оставки, рече дека јавноста наскоро ќе биде информирана за дополнителни кадровски решенија.
Тој изјави дека во вториот круг од локалните избори, според обработените податоци СДСМ победи во општините Центар, Македонска Каменица и Зрновци односно досега вкупно шест.
„Им честитам на граѓаните за достоинственото гласање во вториот круг на локалните избори. Според досега обработените податоци, покрај освоените три градоначалнички места во првиот изборен круг, СДСМ победи во Центар, Македонска Каменица и Зрновци, досега тоа се вкупно шест градоначалници. Очекуваме конечни резултати од уште неколку општини каде разликата е многу мал број на гласови. Им честитам на сите избрани градоначалници од сите политички партии.“ рече Филипче.
На прес-конференцијата, Филипче укажа дека во изминатите две недели од вториот круг од локалните избори, се вршеше огромен притисок во сите општини каде што СДСМ имаше кандидати.
„Во изминатите две недели, во очи вториот круг на изборите, се вршеше огромен притисок на сите кандидати на СДСМ во сите 17 општини каде што влеговме во вториот круг. Не се бираа ниту средства, ниту методи, и тоа само говори дека се соочуваме повторно со истата деструктивна власт на ВМРО-ДПМНЕ како во минатото, која што практично ги злоупотребува сите институции што им се под контрола“, рече претседателот на СДСМ, Венко Филипче.
„Согласно со изборниот резултат на советничките листи и бројот на гласови, СДСМ е втора партија во земјата и прва во опозицискиот блок. Ова е поттик да продолжиме и силно да се бориме против оваа власт, која никогаш повеќе нема да има таква поддршка каква што имаше на изборите минатата година,“ изјави д-р Филипче.
Тој додаде дека резултатите од вториот круг се јасен сигнал за идните чекори на СДСМ и насоката во која ќе се движи партијата.
„Овие избори се јасен патоказ за СДСМ, секако јасен патоказ и за мене како претседател на партијата,“ рече лидерот на СДСМ, д-р Венко Филипче.
