Американската крајбрежна стража повеќе нема да ги класифицира свастиките како симболи на омраза, објави весникот „Вашингтон пост“, посочувајќи дека новата политика треба да стапи во сила следниот месец.
Наместо тоа, амблемот од нацистичката ера ќе биде означен како „потенцијално поделбен“. Вршителот должност командантот на Крајбрежната стража, адмирал Кевин Ландај, во изјава цитирана од весникот, рече дека секое прикажување, користење или промовирање на такви симболи сепак ќе биде „темелно истражено и строго казнето“.
Крајбрежната стража одби да објасни зошто нејзината ажурирана политика повеќе не ја дефинира свастиката како симбол на омраза. Портпаролката Џенифер Плозаи рече дека службата не се согласува со извештајот, но има намера да ги прегледа промените во политиката.
Свастиката беше официјален симбол на нацизмот и стана амблем на нацистичката држава во 1935 година.
Новата политика треба да стапи во сила на 15 декември. Во написот се истакнува и дека таа, исто така, ќе ја категоризира јамката, симбол поврзан со историски линчувања во САД, и знамето на Конфедерацијата, за кое критичарите велат дека го глорифицира робовладетелското минато на јужните држави, како „поделбени“ наместо симболи на омраза.
Крајбрежната стража работи под Министерството за домашна безбедност, предводено од секретарката Кристи Ноем.
