СВР Струмица поднесе кривична пријава до Основното јавно обвинителство Струмица против поранешниот градоначалник на Струмица К.К. (35) и уште пет лица, поради сомнение за злоупотреби во постапката за јавна набавка на електрични автобуси за ЈСП „Струмица-Транспорт“.
Како што информираат од МВР, против К.К. е поднесена пријава поради сомнение дека сторил кривично дело злоупотреба на постапката за јавен повик и доделување договор за јавна набавка. Против Д.П.С. (61), К.Б. (37), Л.Ј. (63) и Л.Ѓ. (62) е поднесена пријава за несовесно работење во службата, додека против Г.П. (58) од Скопје за помагање при извршување на кривични дела злоупотреба на јавна набавка и несовесно работење во службата.
Според наводите, К.К. како поранешен градоначалник ги повредил правилата за јавна набавка на електрични автобуси со ангажирање на Г.П. како лице одговорно за технички прашања, техничка евалуација на понудите, надзор и имплементација на договорот, иако тој немал соодветни стручни квалификации и лиценца А за надзор од областа на електротехниката. Воедно, се посочува дека тендерската документација содржела спецификации што речиси идентично одговарале на спецификациите на конкретно набавените автобуси.
Директорот на ЈСП „Струмица-Транспорт“, Д.П.С., според пријавата, постапил несовесно и пропуштил да изврши должен надзор над целокупната постапка, при што на 12 март 2024 година потпишал договор за јавна набавка на 10 електрични автобуси преку финансиски лизинг, иако во постапката учествувало лице без потребните квалификации и лиценца за надзор.
Претседателката на комисијата за јавни набавки К.Б., заедно со членовите Л.Ј. и Л.Ѓ., како што наведуваат од МВР, го определиле Г.П. за одговорно лице за следење на реализацијата на договорот, иако тој поседувал само лиценца Б и не бил овластен за учество во техничка евалуација, одговарање на технички прашања и надзор над имплементацијата.
Со наведените дејствија биле набавени 10 електрични автобуси во вредност од 429.933.595 денари, при што, според полицијата, е причинета материјална штета од поголеми размери. Воедно, поради отсуство на стручно лице со лиценца А за надзор, доведени се во прашање реалната вредност, квалитетот, безбедноста и веродостојноста на техничките спецификации на набавените автобуси.
