Скарлет Јохансон откри зошто таа и нејзиниот сопруг, комичарот и сценарист Колин Џост, за време на бременоста внимателно го криеле името на својот син Космо. Причината, како што вели актерката, не била мистерија, туку желба да се избегнат несакани коментари и чудни реакции за, според некои, „необичниот“ избор на име.
Гостувајќи во утринската емисија Today, Јохансон искрено призна дека едноставно немала енергија да се соочува со туѓи изрази на лицето и полунасмевки што зборуваат повеќе од зборовите. „Не сакав никакви чудни фаци“, објасни таа. „Знаеш кога ќе му кажеш на некого име, а тој ќе направи онаа пауза и ќе каже: ‘О, тоа е… необично.’“
Актерката, која од бракот со францускиот новинар Ромен Доријак ја има и 11-годишната ќерка Роуз, додава дека за време на бременоста немала ниту трпение ниту расположение за туѓи мислења и коментари. Во период кога телото и умот веќе минуваат низ промени, дополнителниот „суд на јавноста“ бил последното нешто што ѝ било потребно.
За среќа, не морала да се грижи за реакцијата на својата мајка, Мелани Слоун. Таа веднаш го прифатила името Космо, дури и со нота на носталгија. „Ми рече: ‘О, мојата симпатија од трето одделение се викаше Космо’“, раскажува Јохансон, додавајќи дека тоа имало посебно значење за неа. Од другата страна, мајката на Колин Џост, Кери Кели, сепак имала потреба од малку повеќе време за да се навикне на изборот.
Денес, Космо има четири години, а името одамна престана да биде тема за расправа – барем во семејниот круг.
Љубовната приказна на Јохансон и Џост започна далеку од очите на јавноста, но првпат заедно се појавија во јавноста во 2017 година. Оттогаш, тие станаа еден од најсимпатичните и најстабилни холивудски парови. Од црвениот тепих на Мет Гала, преку доделите на Еми наградите, до филмските премиери, нивните појавувања секогаш привлекуваат внимание – не со скандали, туку со спонтаност, хемија и чувство дека зад рефлекторите сепак постои нешто нормално.
