Скопје – СДСМ денеска обвини дека против партијата се води „координирана кампања за внатрешна дестабилизација“, за која тврдат дека е организирана од ВМРО-ДПМНЕ, а координирана од „центарот на СНС“.
„Како што веќе најавивме, се води кампања за обид за дестабилизација на СДСМ одвнатре, од страна на ВМРО, а координирана од центарот на СНС“, соопштуваат од СДСМ.
Според партијата, причината за оваа кампања се, како што наведуваат, „компромитирачки податоци за криминал и корупција“ кои ги изнела АКТ, а кои, според нив, ги поврзуваат СНС и ВМРО.
„Овој октопод е инструиран од СНС и во целост управува со коалицијата ВМРО/ЗНАМ“, се наведува во соопштението.
Од СДСМ тврдат дека по објавите поврзани со Алта банка започнала организирана акција за рушење на кредибилитетот на партијата, која, како што велат, не дала резултат, по што следувала втора фаза – напади одвнатре.
„Бидејќи не успеаја да го урнат кредибилитетот на СДСМ, затоа што податоците и вистината победуваат, преминаа во втора фаза – напад врз СДСМ одвнатре“, наведуваат од партијата.
Во соопштението се посочува дека јавноста можела да ги забележи настапите на поранешни функционери, како и активности на лица кои, според СДСМ, повеќе не се дел од партијата, а некои од нив се приклучиле на ЗНАМ.
Партијата информира и дека претседателот на СДСМ, Венко Филипче, денеска на брифинг со медиумите зборувал за овие настани и, како што тврдат, навел и информации за „планирано финансирање на поединци кои функционираат во рамки на мала група внатре во партијата“.
СДСМ како „посебен пример“ наведува случај во кој, според нив, член на партијата продолжил со кампања во „значаен и релевантен медиум“, по што, како што тврдат, за неполни две минути бил објавен „унапред подготвен текст на истата тема“ на друг портал.
„Или овој наш член ги испратил одговорите и кај Геро, или во координација со него се пишувани неговите одговори“, наведуваат од СДСМ, додавајќи дека со тоа бил нарушен и угледот на медиумот во кој првично бил објавен текстот.
Според партијата, брзината со која биле објавени текстовите е доказ за координација.
„Невозможно е да се напише толку обемен текст за толку кратко време, а уште помалку да се уреди и објави на портал. Сами се разоткрија – со сопствена грешка во чекорите“, стои во соопштението.
Од СДСМ порачуваат дека, како и во претходни случаи, „вистината ќе излезе на виделина“.
„Во паника се брза, а тоа носи грешки. Ни овој пат не ви помина. Граѓаните веќе сè знаат“, наведуваат од партијата, додавајќи дека, како што велат, „вистината и правдата ќе победат“.
