Брижит Бардо, икона на стилот и една од најпознатите убавици на 20 век, почина на 91-годишна возраст, оставајќи длабока трага во светот на филмот, модата и поп-културата. Нејзиниот изглед беше истовремено природен и провокативен – комбинација што ѝ обезбеди статус на симбол на една епоха. Но што всушност стоеше зад таа магнетска привлечност? Според некои – одговорот делумно лежи во математиката.
Според д-р Џулијан де Силва, лондонски естетски хирург, дел од објаснувањето може да се најде во таканаречениот златен пресек – математички сооднос што уште античките Грци го користеле за да го опишат складот и убавината.
„Златниот пресек се применувал во грчката архитектура, во ренесансното сликарство, како и во Витрувијанскиот човек на Леонардо да Винчи – симбол на идеалните пропорции на човечкото тело“, објаснува де Силва.
Колку лицето на Бардо се приближува до идеалот?
Со цел да се провери колку лицето на Брижит Бардо одговара на овој древен естетски принцип, британскиот Daily Mail користеше дигитална алатка за анализа на лицеви пропорции. Резултатот покажа дека нејзиното лице се поклопува со правилата на златниот пресек во 81,62 проценти.
Анализата ги опфати односот меѓу висината и ширината на лицето, пропорциите помеѓу носот, усните и очите, како и вкупната симетрија. Особено висок бил соодносот меѓу филтрумот и носот, додека и останатите сегменти покажувале хармонија што, според естетските стандарди, се доживува како привлечна.
Сепак, и покрај импресивниот резултат, Бардо не го држи врвот на оваа „математичка листа на убавина“. Според анализите на д-р де Силва, некои современи ѕвезди, меѓу кои Ема Стоун, Зендаја, Фрида Пинто и Ванеса Кирби, имаат уште поголемо поклопување со златниот пресек, пренесува Index.hr.
Плавата коса и перцепцијата на привлечноста
Освен лицето, Бардо беше препознатлива и по својата плава коса – елемент што, според некои истражувања, исто така влијае врз перцепцијата на привлечноста. На тоа укажува и студија на Универзитетот Вестминстер од 2011 година.
Во истражувањето, жена со различни перики седела во ноќен клуб, а научниците го следеле однесувањето на мажите. Резултатите покажале дека таа била значително почесто приоѓана кога носела плава коса, додека интересот бил најнизок кога имала црвена.
„Нашата соработничка најчесто добиваше внимание кога беше плава, а најретко кога носеше црвена коса“, наведуваат авторите на студијата.
Природна, но и провокативна
Сепак, бројките и научните анализи не можат целосно да го објаснат феноменот Брижит Бардо. Според Бен МекКан, вонреден професор по француски студии на Универзитетот во Аделаида, нејзината сила лежела токму во контрадикциите.
„Таа истовремено изгледаше спонтано и пресметано, природно и отворено провокативно“, вели МекКан. „Нејзиниот ненаметлив гламур и отворената сексуалност помогнаа во создавањето на архетипот на модерната ‘секси икона’.“
Што всушност е златниот пресек?
Златниот пресек е математички сооднос од 1,618, кој уште од античка Грција се користи за опишување на идеалните пропорции во природата, уметноста и архитектурата. Во ренесансата станал клучен алат за уметници и архитекти во потрагата по хармонија.
Подоцна, овој принцип е применет и во анализата на човечката убавина, преку споредување на должините и односите меѓу деловите на лицето и нивната симетрија. Се смета дека лицата поблиски до овој идеален сооднос се естетски попривлечни – барем според западните културни стандарди.
Но примерот на Брижит Бардо покажува дека вистинската привлечност ретко се сведува само на бројки. Таа произлегува од ставот, харизмата и она тешко мерливо нешто што ниту една формула не може целосно да го опфати.
Редакција Фронтлајн
