Американскиот претседател Доналд Трамп наредил изведување напади врз цели во Венецуела, вклучително и воени објекти во главниот град Каракас, јавува BBC, повикувајќи се на информации од американски официјални извори пренесени преку CBS News.
Снимки и фотографии што кружат на социјалните мрежи прикажуваат густ чад и пожари над делови од Каракас, додека очевидци сведочат за силни експлозии кои ја потресле венецуелската престолнина. Според извештаите, повеќе населби останале без електрична енергија по серија детонации на различни локации во градот.
Владата на Венецуела остро ги отфрли нападите и ги оцени како „воена агресија од страна на Соединетите Американски Држави“. Претседателот Николас Мадуро прогласи вонредна состојба на национално ниво и повика на мобилизација на државните и безбедносните структури.
„Срцето ми чукаше силно, а нозете ми се тресеа“, изјави новинарката Ванеса Силва од Каракас за BBC, опишувајќи ја една од експлозиите што ја видела од својот дом. Таа наведе дека ударот бил „посилен од грмотевица“ и дека вибрациите се почувствувале низ целиот објект. Според неа, експлозиите биле прецизни, но многу блиску до станбени зони.
Каракас, кој се наоѓа во долина, дополнително го засилил ефектот на одекот, што ја зголемило паниката меѓу жителите. По нападите, во градот завладеала тишина, но граѓаните, како што велат очевидци, интензивно комуницирале меѓусебно за да проверат дали нивните блиски се безбедни.
Настаните доаѓаат по недели на зголемени тензии меѓу Вашингтон и Каракас. Претходно, американскиот претседател јавно го обвини Мадуро дека ја користи миграцијата како средство за притисок врз САД, како и дека приходите од нафта се користат за финансирање на криминални и нарко-мрежи.
Само неколку дена пред најновите напади, Мадуро во интервју за венецуелската државна телевизија изјави дека е подготвен за разговори со САД за прашањата поврзани со нафтата и трговијата со дрога, но избегна директно да коментира за претходните американски удари врз објекти поврзани со наводен шверц на наркотици.
Засега нема официјална јавна потврда од Белата куќа или Пентагон за обемот и целите на операцијата, ниту информации за евентуални жртви.
