Русија изврши масовен ракетен и дронски напад врз Кијив и Харкив во текот на ноќта кон сабота, при што беа погодени станбени објекти и енергетска инфраструктура низ повеќе региони во Украина. Украинските власти соопштија дека вкупно биле лансирани 396 ракети и дронови, од кои 372 биле соборени или електронски неутрализирани.
Најтешко погодени беа главниот град Кијив и вториот по големина град Харкив. Според локалните власти, најмалку едно лице загина, а повеќе од 20 лица се повредени.
Градоначалникот на Кијив, Виталиј Кличко, ги повика граѓаните да не ги напуштаат засолништата, наведувајќи дека во неколку делови од градот избувнале пожари поради пад на остатоци од дронови, а на одредени локации биле прекинати водоснабдувањето и греењето. Голем број жители ја поминале ноќта во станиците на метрото, кои повторно беа користени како засолништа.
Според директорот на државниот оператор на електроенергетската мрежа „Укренерго“, околу 80 проценти од територијата на Украина била погодена од итни и непланирани рестрикции на електричната енергија како директна последица од нападите.
Во Харков, серија силни експлозии оштетија повеќе станбени згради. Градоначалникот Игор Терехов соопшти дека имало пожари во станови во висококатници, како и штети на хостел во кој биле сместени раселени лица, болница и породилиште. Четиринаесет лица се повредени, меѓу кои бремена жена и дете.
Сериозно беше погоден и северниот град Чернигов, каде што, според локалните власти, нападите ја оштетиле енергетската инфраструктура, а поголем дел од градот бил под артилериски и дронски оган.
Напади за време на дипломатски разговори
Новата ескалација доаѓа во момент кога во Абу Даби се одржуваат разговори меѓу претставници на Русија, Украина и Соединетите Американски Држави, започнати во петокот и продолжени во саботата. Преговорите се водат врз основа на план поддржан од американскиот претседател Доналд Трамп, со цел завршување на војната која трае речиси четири години.
Во пресрет на разговорите, украинскиот претседател Володимир Зеленски изјави дека клучното спорно прашање останува територијалното – при што Москва инсистира на повлекување на украинските сили од Донбас, индустрискиот регион во источна Украина.
