Платформата за борба против корупција упати допис до претседателката на Република Северна Македонија, Гордана Силјановска Давкова, со барање да не го потпише указот за прогласување на Законот за изменување и дополнување на Кривичниот законик и да го искористи уставното право на вето.
Како што соопштува Платформата, иако постои потреба од интервенции во Кривичниот законик, особено по измените од 2023 година, усвоените решенија, според нив, создаваат дополнителна правна несигурност и ризик од уназадување на борбата против високата корупција.
Во дописот се наведува дека со измените на кривичните дела злоупотреба на службената положба и несовесно работење во службата се предвидуваат пониски максимални казни, што може да влијае врз казнената политика и роковите за застарување на кривичното гонење за тешки облици на корупција. Дополнително, според Платформата, заштитата на јавните средства се стеснува, а кај делото несовесно работење се укинува јасната инкриминација на постапувањето на службените лица во органите на државната управа.
Како проблематични се посочуваат и предложените решенија за проширената конфискација, за кои се оценува дека не се усогласени со Законот за кривичната постапка и со меѓународните стандарди, како и фактот што антикорупциските измени се носат во ист законски пакет со одредби за усогласување со Истанбулската конвенција и зајакнување на заштитата од семејно и родово базирано насилство.
Од Платформата нагласуваат и дека начинот на донесување на измените, без соодветни јавни консултации и без систематско вклучување на јавните обвинители и судиите, не одговара на значењето и чувствителноста на материјата.
Платформата изразува уверување дека претседателката ќе ги земе предвид изнесените аргументи и ќе го врати законот на повторно разгледување во Собранието, со цел суштинска доработка на спорните решенија и заштита на правната сигурност и борбата против корупцијата.
