Истражувањето објавено од неделникот „Фокус“, со наслов „Долината на волците на градоначалникот на Тетово“, отвора сериозни и аргументирани сомнежи за клиентелистички, семејни и политички врски во постапките за јавни набавки во општините Тетово и Желино, соопшти Алијансата за Албанците (АА), крило на Арбен Таравари.
Според соопштението, истражувањето наведува дека градежни компании поврзани со градоначалникот на општина Тетово Билал Касами, пратеникот Аднан Азизи и други функционери од актуелната власт оствариле јавни набавки во вредност од над 6 милиони евра, што, како што се наведува, претставува индиции за корупција, судир на интереси и злоупотреба на службената должност.
Како особено загрижувачки се посочуваат наводите за фаворизирање на компанијата „Мурана компани“, која, според Алијансата за Албанците, е во сопственост на вујкото на градоначалникот Касами, како и на поврзаноста со други партнерски компании кои, според истражувањето на „Фокус“, континуирано добивале инфраструктурни проекти во текот на два последователни мандати.
Во соопштението се наведува дека сериозни правни дилеми отвора и начинот на спроведување на тендерските постапки. Според наводите од истражувањето, при дел од јавните набавки не биле барани соодветни градежни референци или претходно искуство, туку биле поставени само минимални формални критериуми, што, како што се оценува, е спротивно на принципите на фер конкуренција и рационално трошење на јавните средства.
„Во правна држава, сериозните индиции документирани и објавени во медиумите го обврзуваат Јавното обвинителство да постапи по службена должност. Институционалниот молк и отсуството на реакција од страна на Општина Тетово само ги продлабочуваат сомнежите“, се наведува во соопштението.
Алијансата за Албанците бара итна, независна и неселективна истрага, нагласувајќи дека јавните средства не се ниту семејна, ниту партиска сопственост.
„Владеењето на правото се тестира токму во вакви случаи“, се додава во соопштението на Алијансата за Албанците, крило на Арбен Таравари.
