Во вторник, со почеток во 20:00 часот, во просторот ТРН во Дебар Маало, спроти Министерството за култура, ќе се одржи „Отворен вторник“ со визуелниот и перформативен уметник Васил Тасевски, информира Партизанска штампа.
Настанот е замислен како мултимедијална и перформативна вечер која вклучува промоција на уметникова книга, видео-арт проекција и музичко-перформативна програма во живо. Во рамки на вечерта ќе биде промовирана книгата „Отпечатени впечатоци“, изработена во техника сито печат, создадена за време на кратка резиденција во студиото на Партизанска штампа.
Покрај промоцијата на книгата, ќе биде прикажана и селекција од кратки филмови на Тасевски, реализирани за време на негови резиденцијални престои во Франција. Програмата ќе биде дополнета со музичка селекција на диџеј Владимир Муратовски – Диво, колаж-работилница на Скопје Колаж Колектив, како и со музички настап на Дарко Тасевски.
Книгата „Отпечатени впечатоци“ претставува серија фотографии отпечатени во сито печат, преку кои авторот ги пренесува личните и несвесни впечатоци од патувања што со текот на времето се развиваат во визуелни наративи. Соработката меѓу Партизанска штампа и Васил Тасевски започнала во рамки на Уметничката резиденција Папрадиште, како процес на заедничка продукција што ги поврзува фотографијата, графиката и експерименталните визуелни практики.
Васил Тасевски (роден 1984 година во Скопје) е уметник чија практика се развива околу аналогната фотографија, телото, движењето и односот меѓу светлината и просторот. Образуван во Франција во областа на циркуските уметности и современата уметност, тој ја третира фотографијата како чувствителен и временски условен медиум. Неговите дела се претставени на повеќе изложби и проекти во Македонија и Франција, меѓу кои „Осетливи ткива“ во Музејот на Македонија во 2023 година и „Осетливи површини“ во Лориент во 2025 година.
Настанот е дел од новата програма на Партизанска штампа, преку која се најавува серија резиденцијални престои и јавни презентации на уметници надвор од класичниот галериски контекст, со фокус на современата уметност во неформален и отворен простор.
