ХЕРА – Асоцијација за здравствена едукација и истражување, во партнерство со Националниот младински совет на Македонија и со поддршка од Регионалната канцеларија за младинска соработка (RYCO), спроведува четиридневна обука „Млади за локален мир и учество“, која се одржува од 19 до 22 февруари во Велес.
Според ХЕРА, младите во Северна Македонија се соочуваат со ограничено учество во процесите на донесување одлуки и недоволно развиени механизми за нивно вклучување. „Повеќе од две третини од младите сметаат дека не се вклучени соодветно во процесот на донесување на одлуки, а дури 70% од младите не се заинтересирани за политиката“, се наведува во соопштението.
Од организацијата посочуваат дека состојбата е особено загрижувачка на локално ниво. „Само 19 општини имаат формирано локален младински совет, а локални стратегии за млади се усвоени само во 7 општини“, наведува ХЕРА.
Програмската директорка на ХЕРА, Елизабета Божиноска, истакна дека младинското учество е клучно за развојот на општеството. „Треба да не загрижи податокот што 74% од младите не се вклучени во ниту една организација или друга форма на формално здружување. ХЕРА силно верува дека младите се движечка сила на секоја позитивна промена во општеството“, рече Божиноска.
На обуката се обрати и државниот секретар во Министерството за социјална политика, демографија и млади, Фатмир Сабриу, кој нагласи дека младите имаат клучна улога во општеството. „Денешниот настан испраќа силна порака – дека младите не се иднината што ќе дојде утре, туку сегашноста што делува денес“, изјави Сабриу.
Раководителот на локалната канцеларија на RYCO во Скопје, Владимир Ѓорѓевски, истакна дека институционалната соработка е важна за младинското учество. „Во овие процеси соработката на младите со институциите е најважна, бидејќи само така младите чувствуваат сопственост и се креираат институционални решенија кои се по мерка на младите“, рече Ѓорѓевски.
Обуката обединува млади од различни заедници, кои преку интерактивни сесии и неформално образование стекнуваат знаења за младинско учество, интеркултурен дијалог и соработка со институциите, со цел да иницираат промени и да придонесат кон развој на локални политики.
